خدا گواہ کے پروڈیوسر کو امیتابھ کی والدہ نے دھمکی دی تھی

اگر تم میری بیٹی کے بغیر بھارت واپس آئے تو تمہیں قتل کروادیا جائے گا

بدھ 11 مئی 2022 12:04

خدا گواہ کے پروڈیوسر کو امیتابھ کی والدہ نے دھمکی دی تھی

ممبئی (اُردو پوائنٹ اخبارتازہ ترین - این این آئی۔ 11 مئی2022ء) بالی ووڈ کے معروف فلم پروڈیوسر منوج ڈیسائی اس وقت مشکل میں پڑگئے تھے جب 1992 میں ان کی پروڈیوس کردہ فلم ’خدا گواہ‘ کی شوٹنگ کے لیے فلم کی ٹیم افغانستان گئی ہوئی تھی۔اپنے ایک حالیہ انٹرویو میں منوج ڈیسائی نے کہا کہ بالی ووڈ سپر اسٹار امیتابھ بچن کی والدہ تیجی بچن اور آنجہانی اداکارہ سری دیوی کی والدہ راجیشوری نے اس فلم کی شوٹنگ کے دوران انہیں ایک بار دھمکی بھی دی۔

منوج ڈیسائی کے مطابق تیجی بچن نے ان سے کہا کہ اگر امیتابھ کی اہلیہ اداکارہ جیا بچن بیوہ ہوئیں تو پھر تمہاری بیوی کو بھی بیوہ ہونا پڑے گا، جبکہ سری دیوی کی والدہ نے ان سے کہا کہ اگر ان کی بیٹی کو کچھ ہوا تو پھر تمہیں (ڈیسائی) کابل میں ہی قیام کرنا پڑے گا۔

(جاری ہے)

انہوں نے دھمکی دیتے ہوئے کہا کہ اگر تم میری بیٹی کے بغیر بھارت واپس آئے تو تمہیں قتل کروادیا جائے گا۔

واضح رہے کہ یہ فلم جس عہد میں بنائی گئی اس وقت افغانستان سے سابق سوویت یونین کی فوجیں نکل چکی تھیں اور ملک میں خانہ جنگی ہورہی تھی۔ اس دوران اس فلم کی کابل اور مزار شریف میں شوٹنگ ہوئی اور اس وقت کے افغان صدر ڈاکٹر نجیب اللہ نے 1991 میں 18 روزہ شوٹنگ کے لیے مکمل سیکیورٹی فراہم کی تھی۔اس فلم میں امیتابھ بچن اور سری دیوی کے علاوہ نگر جونا، شلپا شروڈوکر، ڈینی ڈینزونگپا اور کرن کمار نے بھی اداکاری کے جوہر دکھائے تھے۔