سندھ میں ای سٹیمپنگ نظام نافذ‘جعلی اور بوگس سٹامپ پیپرز کا خاتمہ ممکن ہو گا‘ چیئرمین پی آئی ٹی بی آصف بلال لودھی

پنجاب میں ای سٹیمپنگ کے تحت حکومت کو 258 ارب کا ریونیو وصول ہو چکا‘ خیبر پی کے میں بھی جلد نافذ ہو جائیگا‘ آصف بلال لودھی

بدھ 11 مئی 2022 11:34

سندھ میں ای سٹیمپنگ نظام نافذ‘جعلی اور بوگس سٹامپ پیپرز کا خاتمہ ممکن ..

کراچی (اُردو پوائنٹ اخبارتازہ ترین۔ 11 مئی2022ء) پنجاب میں کامیابی کے بعد سندھ میں بھی ای سٹیمپنگ نظام جعلی اور بوگس سٹامپ پیپرز کے خاتمے میں معاون ثابت ہو گا۔ یہ بات چیئرمین پی آئی ٹی بی آصف بلال لودھی نے کراچی میں ای سٹیمپنگ نظام کی افتتاحی تقریب میں کہی۔ تقریب میں وزیراعلیٰ سندھ سید مراد علی شاہ‘منسٹر ریونیو مخدوم محبوب زمان‘ سینئر ممبر بی او آر بقااللہ‘ صدر نیشنل بینک عارف عثمانی‘ سیکرٹری لوکل گونمنٹ نجم احمد شاہ‘ نگران گورنر سٹیٹ بینک مرتضیٰ سید‘ ڈی جی پی آئی ٹی بی ساجد لطیف‘ ڈائریکٹر حماد ہمدانی اور دیگر نے شرکت کی۔

چیئرمین آصف بلال نے کہا کہ سندھ کے 11 اضلاع میں منصوبے کا آغاز کر دیا گیا ہے اور جلد ہی پورے سندھ میں پھیلایا جائے گا۔ای سٹامپ پیپر کے حصول کیلئے کوئی بھی شخص آن لائن جا کر مطلوبہ معلومات درج کرے گا تو سسٹم خودکار طریقے سے خریدار کیلئے سٹامپ پیپر کی مالیت طے کر دے گا‘اس طرح نیشنل بینک سے جوڈیشل اور نان جوڈیشل سٹامپ پیپر صرف پندرہ منٹ میں حاصل کئے جا سکیں گے۔

(جاری ہے)

اس سے قبل پنجاب میں ای سٹیمپنگ کے تحت حکومت کو اب تک 258 ارب روپے کا ریونیو وصول ہو چکا ہے جبکہ 1 کروڑ 21 لاکھ سے زائد ای سٹامپ پیپرز جاری ہو چکے۔ انہوں نے کہا پی آئی ٹی بی کی معاونت سے خیبرپختونخوا میں بھی یہ نیا نظام جلد نافذ کیا جا رہا ہے۔