نوجوانوں کو جدید مہارتوں اور بین الاقوامی زبانوں سے آراستہ کرنا وقت کی اہم ضرورت ہے ، چوہدری سالک

اسلام آباد (اُردو پوائنٹ اخبارتازہ ترین - این این آئی۔ 12 مئی2026ء) وفاقی وزیر سمندر پار پاکستانی و انسانی وسائل ترقی چوہدری سالک حسین نے کہا ہے کہ نوجوانوں کو جدید مہارتوں اور بین الاقوامی زبانوں سے آراستہ کرنا وقت کی اہم ضرورت ہے ،جاپان پاکستان ترقیاتی مرکز اس سلسلے میں کلیدی کردار ادا کرے گا۔ وہ علامہ اقبال اوپن یونیورسٹی میں جاپان پاکستان ترقیاتی مرکز کی افتتاحی تقریب سے خطاب کر رہے تھے جس میں پاکستان میں جاپان کے سفیر آکاماتسو شوئیچی نے بھی شرکت کی۔

وفاقی وزیر نے کہا کہ یہ مرکز دونوں ممالک کے درمیان تعلیمی، ثقافتی اور معاشی تعاون کے فروغ میں اہم کردار ادا کرے گا اور پاکستان و جاپان کی دوستی کو مزید مضبوط بنائے گا۔ انہوں نے کہا کہ یہ مرکز پاکستانی نوجوانوں کے لئے جاپان میں انٹرپرینیورشپ اور پیشہ وارانہ مواقع تک رسائی کے نئے دروازے کھولنے میں مددگار ثابت ہوگا۔

(جاری ہے)

تقریب سے قبل وفاقی وزیر جاپانی سفیر اور جامعہ کے وائس چانسلر نے شجرکاری مہم کے تحت پودے لگائے اور پاکستان و جاپان کی ترقی و خوشحالی کے لئے خصوصی دعا بھی کی گئی۔

تقریب کا آغاز پاکستان اور جاپان کے قومی ترانوں سے ہوا۔یونیورسٹی کے وائس چانسلر پروفیسر ڈاکٹر ناصر محمود نے کہا کہ اس مرکز کا قیام پاکستان اور جاپان کے درمیان تعلیمی و ثقافتی تعلقات کو مزید مستحکم بنانے کی جانب ایک اہم پیشرفت ہے۔ انہوں نے کہا کہ علامہ اقبال اوپن یونیورسٹی ہمیشہ جدید تعلیم، تحقیق اور بین الاقوامی روابط کے فروغ کے لئے کوشاں رہی ہے اور یہ مرکز اسی وژن کی عملی تعبیر ہے۔

جاپانی سفیر آکاماتسو شوئیچی نے دونوں ممالک کے دوستانہ تعلقات کو سراہتے ہوئے کہا کہ پاکستان اور جاپان کے درمیان تعلیمی تعاون مستقبل میں مزید فروغ پائے گا۔ انہوں نے امید ظاہر کی کہ یہ مرکز نوجوانوں کو نہ صرف جاپانی زبان سیکھنے کے مواقع فراہم کرے گا بلکہ ان کی پیشہ وارانہ ترقی میں بھی اہم کردار ادا کرے گا۔آفس آف ریسرچ انوویشن اینڈ کمرشلائزیشن کی ایڈیشنل ڈائریکٹر ڈاکٹر صائمہ ناصر نے اپنے خطاب میں کہا کہ اس نوعیت کے اقدامات تحقیق، جدت اور بین الاقوامی اشتراک کے نئے دروازے کھولتے ہیں۔

انہوں نے کہا کہ یہ مرکز طلبہ و محققین کو جاپانی زبان و ثقافت کے ساتھ ساتھ جدید سائنسی و فنی رجحانات سے بھی روشناس کرائے گا جس سے جامعہ کی تحقیقی صلاحیتوں کو مزید تقویت ملے گی۔تقریب کے دوران جاپانی زبان کی جماعت اورریڈ جاپان منصوبہکے تحت قائم کئے گئے کتب گوشے کا بھی افتتاح کیا گیا۔ کتب خانے کے نگران سید غلام کاظم علی نے مہمانوں کو کتب خانے میں قائم ریڈ جاپان منصوبے کے حوالے سے تفصیلی بریفنگ دی۔