پاکستانی امریکن کمیونٹی نے امریکہ کی تعمیر و ترقی میں اہم کر دارادا کیا ہے، ہیلری کلنٹن

جمعرات 28 جولائی 2022 17:22

نیویارک (اُردو پوائنٹ اخبارتازہ ترین - این این آئی۔ 28 جولائی2022ء) سابق امریکی وزیر خارجہ ہیلری کلنٹن نے کہا ہے کہ پاکستانی امریکن کمیونٹی نے امریکہ کی تعمیر و ترقی میں اہم کر دارادا کیا ہے اور ان کی خواہش ہے کہ کانگریس میں ڈیمو کریٹس کی طرف سے مزید پاکستانی نژادامریکی الیکشن جیت کر آئیں ۔ انہوں نے یہ بات معروف پاکستانی نژاد امریکی اور کیلیفورنیا سے کانگریس کے امیدوار ڈاکٹر آصف محمود کے اعزاز میں منعقدہ تقریب سے خطاب کرتے ہوئے کہی ۔

تقریب کا اہتمام پاکستانی کمیونٹی کے ممتاز رہنما مرزا خاور بیگ اور شکاگو میں مقیم معروف پاکستانی بزنس مین نوید انور چوہدری کی جانب سے کیا گیا ۔تقریب میں سابق امریکی وزیر خارجہ نے ڈاکٹر آصف محمود کو کیلیفورنیا سے کانگریس کا امیدوار بننے کے فیصلے کی تائید کی جسے پاکستانی امریکن کمیونٹی نے سراہا ۔

(جاری ہے)

ہیلری کلنٹن نے اپنے خطاب میں کہاکہ پاکستانی امریکن کمیونٹی نے امریکہ کی تعمیر و ترقی اور شہریوں کے مسائل کے حل میں اپنا بھرپور کر دار ادا کیا ہے اور ہمارے لئے بڑی خوشی کی بات ہے کہ پاکستانی امریکن مقامی انتخابات کے بعد اب کانگریس کی سطح پر بھی انتخابات میں حصہ لے رہے ہیں ۔

تقریب سے خطاب میں مرزا خاور بیگ نے کہاکہ ڈاکٹر آصف محمود نے پاکستان میں کورونا کو کنٹرول کر نے کیلئے مفت ویکسین بھجوانے میں جو کر داراداکیا تھا اس پر پاکستانی عوام ان کے شکر گزار ہیں اور انہوںنے ہمیشہ پاکستانی کمیونٹی کے مسائل کے حل کیلئے اپنافعال کر داراداکیا ہے ۔ اس موقع پر اپنے خطاب میں شکاگو میں مقیم پاکستانی بزنس مین نوید انور چوہدری نے کہاکہ ہمارے لئے بہت خوشی اور فخر کی بات ہے کہ معروف پاکستانی امریکن شخصیت ڈاکٹر آصف محمود کیلیفورنیا سے کانگریس کا الیکشن لڑ رہے ہیں اور پاکستانی کمیونٹی ان کی کامیابی کیلئے اپنا بھرپور کر دارادا کرے گی ۔

انہوںنے کہاکہ اس تقریب میں امریکہ کی سابق وزیر خارجہ ہیلری کلنٹن کی آمد ہمارے لئے خوشی کا باعث ہے اور ہیلری کلنٹن نے پاکستانی کمیونٹی کے مسائل کے حل میں ہمیشہ دلچسپی لی ہے ۔