یوم دفاع اور شہداء کی پر وقار تقریب ، سیلاب متاثرین کے ساتھ اظہار یکجہتی

تقریب میں معروف گلوکار ساحر علی بگا نے ملی نغمہ دل اور قریب آ جائیں گے سنایا پاک فوج کے ارتقائی سفر پر خصوصی ڈاکومینٹری عظم و ہمت کے 75 سال بھی دکھائی گئی

بدھ 23 نومبر 2022 23:08

راولپنڈی (اُردو پوائنٹ اخبارتازہ ترین - این این آئی۔ 23 نومبر2022ء) یوم دفاع اور شہدا کی پروقار تقریب میں حالیہ تباہ کن سیلاب اور اس کے نتیجے میں بڑے پیمانے پر تباہی کے حوالے سے ویڈیو چلائی گئی، جس میں سیلاب متاثرین کے ساتھ اظہار یکجہتی کیا گیا ۔تفصیلات کے مطابق یہ تقریب ہر سال 6 ستمبر کو جنرل ہیڈ کوارٹرز (جی ایچ کیو)راولپنڈی میں 1965کی جنگ کے شہید ہونے والے ہیروز کی قربانیوں کی یاد میں منعقد کی جاتی ہے تاہم رواںسال ملک بھر کے سیلاب متاثرین کے ساتھ اظہار یکجہتی کیلئے اسے ملتوی کر دیا گیا تھا۔

جی ایچ کیو میں ہونے والی تقریب کا آغاز تلاوت قرآن پاک سے ہوا، اس کے بعد حالیہ تباہ کن سیلاب اور اس کے نتیجے میں بڑے پیمانے پر تباہی کے حوالے سے ایک ویڈیو بھی چلائی گئی، جس میں سیلاب متاثرین کے ساتھ اظہار یکجہتی کیا گیا، اس ویڈیو میں پاک فوج کے ریسکیو، ریلیف اور بحالی کی کوششوں کو بھی دکھایا گیا۔

(جاری ہے)

۔ایک دوسری فوٹیج چلائی گئی، جس میں پاک فوج کی جانب سے ملک بھر میں جاری تعلیم اور صحت جیسے اہم شعبوں میں کردار پر بھی روشنی ڈالی گئی۔

تقریب میں معروف گلوکار ساحر علی بگا نے ملی نغمہ دل اور قریب آ جائیں گے سنایا۔پاک فوج کے ارتقائی سفر پر خصوصی ڈاکومینٹری عظم و ہمت کے 75 سال بھی دکھائی گئی۔اقوام متحدہ کے سیکریٹری جنرل کی جانب سے دنیا بھر میں امن کے حوالے سے کوششوں پر پاک فوج کو سراہنے کے بیان کو بھی خصوصی ویڈیو میں شامل کیا گیا۔ویڈیو میں بتایا گیا کہ بلوچستان میں ریکوڈک منصوبے کے حوالے سے پاکستان پر تقریبا 11 ارب ڈالر کا جرمانہ کیا گیا تاہم افواج پاکستان نے کوششیں کرکے تنازعے کو حل کروایا اور مملکت خداد کو جرمانہ ادا نہ کرنا پڑا۔

خصوصی ڈاکومینٹری میں بتایا گیا کہ 2009میں اس وقت کے آرمی چیف جنرل اشفاق پرویز کیانی نے پاکستان میں دہشت گردی کے عذاب سے چھٹکارا پانے کے لیے آپریشن راہ نجات اور بعد ازاں ضرب عضب شروع کیا گیا، اس کے بعد موجودہ آرمی چیف جنرل قمر جاوید باجوہ نے 2017 میں ردالفساد کا آغاز کیا گیا۔یاد رہے کہ آرمی چیف جنرل قمر جاوید باجوہ پاک فوج کی کمان سنبھالنے کے 6 برس بعد رواںماہ کے آخر میں ریٹائر ہو رہے ہیں۔