ضمنی الیکشن جیت کرراولپنڈی کے عوام کی خدمت کرونگا،عاصم ظہور

ماضی کے حکمرانوں نے ہمیشہ راولپنڈی کو نظرانداز کیا ہے ، میرا مقابلہ شیخ رشید ہے،آزادامیدوار

جمعرات 2 مارچ 2023 18:11

راولپنڈی(اُردو پوائنٹ اخبارتازہ ترین - این این آئی۔ 02 مارچ2023ء) راولپنڈی قومی اسمبلی کے حلقہ این اے 62 سے آزاد امیدوار راجہ عاصم ظہورنے کہا ہے کہ ضمنی الیکشن جیت کرراولپنڈی کے عوام کی خدمت کرونگا،پندرہ مرتبہ وزارت کے مزے لینے والے آج کس منہ سے عوام کا سامنا کر رہے ہیں ،ماضی کے حکمرانوں نے ہمیشہ راولپنڈی کو نظرانداز کیا ہے ، میرا مقابلہ شیخ رشید ہے،میں اپنی سیٹ جیت کر عوام کو تحفہ دونگا۔

ان خیالات کا ا ظہار راجہ عاصم ظہور نے راجہ بازار میں مرکزی الیکشن آفس کے افتتاح اور تاجروں سے ملاقات کے موقع پر کیا۔

(جاری ہے)

اس موقع پر شیخ فیاض احمد ،تنویر احمد پاشا اور کارکنان موجود تھے۔ راجہ عاصم ظہور نے کہاکہ میں تمام جماعتوں کا مشکور ہوں کہ انہوں نے میری حمایت کا اعلان کیا ہے۔انہوںنے کہاکہ راولپنڈی کے عوام شیخ رشید سے جان جھڑانا چاہتے ہیں۔

انہوں نے کہا کہ میں تاجربرادری کا شکرگزار ہوں کہ انہوں نے میری حوصلہ افزائی کی۔ راجہ عاصم ظہور نے کہاکہ شیخ رشید نے ماضی میں اس حلقہ پر کوئی توجہ نہیں دی اور راولپنڈی شہر بنیادی سہولیات سے محروم ہے ،میں اپنی نشت جیت کر راولپنڈی شہر کے عوام کو تحفہ دونگا اور ضمنی الیکشن کے بعد راولپنڈی شہر میںترقی کا نیا دور شروع ہو گا۔