میری حکومت پر کرپشن کا ایک بھی الزام نہیں، شہبازشریف کا دعویٰ

شی جن پنگ کرپشن اور غربت کے خاتمے پر یقین رکھتے ہیں، یہی ہماری پالیسی بھی ہے، شفافیت اوران تھک محنت قوموں کی تقدیر بدل سکتی ہے؛ وزیراعظم کا چین کی تیانجن یونیورسٹی میں خطاب

ساجد علی اتوار 31 اگست 2025 17:53

میری حکومت پر کرپشن کا ایک بھی الزام نہیں، شہبازشریف کا دعویٰ

تیانجن ( اُردو پوائنٹ اخبارتازہ ترین۔ 31 اگست 2025ء ) وزیراعظم شہبازشریف نے دعویٰ کیا ہے کہ میری حکومت پر کرپشن کا ایک بھی الزام نہیں۔ چین کی تیانجن یونیورسٹی میں خطاب کرتے ہوئے انہوں نے کہا کہ شی جن پنگ کرپشن اور غربت کے خاتمے پر یقین رکھتے ہیں اور یہی ہماری پالیسی بھی ہے، اس وقت پاکستان میں ہماری حکومت کو ڈیڑھ سال ہو چکا ہے اور میں پوری یقین دہانی سے کہہ سکتا ہوں کہ میری حکومت پر کرپشن کا ایک بھی الزام نہیں لگا، بدعنوانی اورغربت کا خاتمہ ہماری حکومت کی ترجیح ہے، شفافیت اوران تھک محنت قوموں کی تقدیر بدل سکتی ہے، غربت کے خاتمے اور مشترکہ خوشحالی کا صدر شی جن پنگ کا ویژن ہمارے لیے مشعل راہ ہے، ہمیں اپنے نوجوانوں کی صلاحیتوں سے استفادہ کرنا ہے۔

شہبازشریف کا کہنا ہے کہ چین اگر آج دنیا کی بڑی معاشی اور فوجی قوت ہے تو یہ صرف باتوں سے نہیں بلکہ عملی طریقے سے ممکن ہوا ہے،صنعتی، زرعی، سائنس و ٹیکنالوجی اور دیگر شعبوں میں ترقی کے لئے پاکستان چین کی پیروی کر رہا ہے، پاکستان مسلم دنیا کا پہلا ملک تھا جس نے عوامی جمہوریہ چین کو تسلیم کیا، 60 سال قبل بیجنگ جانے والی پہلی بین الاقوامی پرواز کراچی سے روانہ ہوئی، پاکستان اور چین کی دوستی ہمالیہ سے بلند ہے، پاک چین دوستی کی مشعل اب نوجوانوں کے ہاتھ میں ہے، آئیں مل کر ترقی اور خوشحالی کا ایک نیا باب رقم کریں۔

(جاری ہے)

انہوں نے کہا کہ چین نے 80 کروڑ سے زیادہ افراد کو خط غربت سے نکالا، یہ ایک بہت بڑی کامیابی اور دنیا کے لیے ماڈل ہے، چین آج دنیا کی ایک بڑی معاشی و فوجی طاقت ہے، ہمیں چین کے ساتھ اپنی مضبوط دوستی پر فخر ہے، چین کے ویژنری لیڈر صدر شی جن پنگ کے مشترکہ خوشحالی کے ویژن نے دنیا کو اپنا گرویدہ کر لیا ہے، پاکستان صدر شی جن پنگ کے ویژن اور فلسفے کی مکمل حمایت کرتا ہے کیوں کہ عوام کی فلاح و بہبود چین کی حکومت کی ترجیح ہے۔