سندھ زرعی یونیورسٹی کے وائس چانسلر سمیت پاکستان کی 11جامعات کے وائس چانسلرز تربیتی پروگرام میں شرکت کیلئے کوریا پہنچ گئے

حیدرآباد (اُردو پوائنٹ اخبارتازہ ترین - اے پی پی۔ 17 مارچ2023ء) سندھ زرعی یونیورسٹی ٹنڈوجام کے وائس چانسلر سمیت پاکستان کی 11جامعات کے وائس چانسلرز تربیتی پروگرام میں شرکت کیلئے کوریا پہنچ گئے۔ وائس چانسلر نے مختلف تربیتی پروگرامز اور صلاحیت میں اضافے سے متعلقہ ورکشاپس میں شرکت کی ۔ ہائر ایجوکیشن سسٹم سٹرینتھننگ ایکٹیویٹی ،ایچ ای ایس ایس اے کی سولہ میں سے گیارہ پارٹنر یونیورسٹیوں کے وائس چانسلرز مطالعاتی دورے پر جنوبی کوریا پہنچ چکے ہیں، جہاں ہفتہ بھر کے دورے کی میزبانی جمہوریہ کوریا کے انچیون میں واقع یوٹاہ یونیورسٹی کر رہی ہے۔

اس ضمن میں جاری کردہ اعلامیہ کے مطابق سندھ زرعی یونیورسٹی ٹنڈوجام کے وائس چانسلر ڈاکٹر فتح مری اور دیگر جامعات کے وائس چانسلرز تربیتی پروگرامز میں شرکت کیلئے جنوبی کوریا پہنچ گئے ہیں، جہاں پر مختلف ٹریننگ پروگرامز کے ذریعے جامعات کی انتظامکاری اور پائیداری کے منصوبے تیار کرنا ہے ۔

(جاری ہے)

اس کے علاوہ انچیون میں انٹرنیشنل گلوبل کیمپس ،آئی جی سی،میں تعلیمی و تحقیقی سرگرمیوں سے متعارف کرایا جائے گا، جہاں دنیا کے ممتاز تدریسی ادارے یوٹاہ یونیورسٹی، نیویارک کی اسٹونی بروک اسٹیٹ یونیورسٹی، جارج میسن یونیورسٹی، اور بیلجیئم کی گینٹ یونیورسٹی بھی شامل ہونگی اور پاکستانی اعلی تعلیمی اداروں کے سربراہان، آئی جی سی مینجمنٹ اور گورننس ٹیم کے ساتھ بات چیت کرے گی تاکہ ادارہ جاتی انتظامکاری کے نظام کو مربوط بنانے کے طریقوں کو عمل میں لایا جا سکے۔

وائس چانسلرز کے وفد کی قیادت و معاونت ایچ ای ایس ایس اے کے چیف اور یونیورسٹی آف یوٹاہ میں اکنامکس کے ریسرچ پروفیسر ڈاکٹر اسلم چوہدری کر رہے ہیں، اس مطالعاتی دورے کا مقصد ایچ ای ایس ایس اے پارٹنر یونیورسٹیوں کے لیے کاروبار اور سٹریٹجک منصوبہ بندی کا آغاز کرنا ہے ۔وائس چانسلرز جامعات کی ترقی اور توسیع کے لیے کاروباری منصوبوں کی ترقی، طے شدہ اہداف اور ان کے حصول کے لیے حکمت عملی، شراکت داری سمیت وسائل کو متحرک کرنے اور ہنگامی منصوبہ بندی جیسے موضوعات پر تربیت اور بات چیت میں مشغول ہوں گے اور جامعات کو ایسے پروگرامز کے قابل بنایا جائے گا جو طلبا میں کیمپس کا تجربہ اور ملازمت کی صلاحیت میں مددگار ثابت ہوگا۔