Live Updates

توشہ خانہ کیس، عمران خان کے ناقابل ضمانت وارنٹ گرفتاری منسوخ

اسلام آباد کی عدالت نے تحریک انصاف کے سربراہ کیخلاف فرد جرم کی کاروائی بھی موخر کر دی، آئندہ سماعت 30 مارچ کو ہو گی، سماعت میں کیس کے قابل سماعت ہونے یا نہ ہونے سے متعلق دلائل دیے جائیں گے

محمد علی ہفتہ 18 مارچ 2023 19:00

توشہ خانہ کیس، عمران خان کے ناقابل ضمانت وارنٹ گرفتاری منسوخ

اسلام آباد (اردوپوائنٹ،اخبارتازہ ترین ۔ 18 مارچ 2023ء) توشہ خانہ کیس، عمران خان کے وارنٹ گرفتاری منسوخ کر دیے گئے۔ اے آر وائی نیوز کے مطابق اسلام آباد کی عدالت نے تحریک انصاف کے سربراہ عمران خان کو ہفتے کے روز عدالت حاضری کیلئے جوڈیشل کمپلیکس آنے کے بعد ریلیف دے دیا۔ عدالت کی جانب سے عمران خان کے جاری شدہ ناقابل ضمانت وارنٹ گرفتاری منسوخ کر دیے گئے، جبکہ ان کیخلاف آج فرد جرم کی کاروائی بھی نہیں ہوئی۔

اسلام آباد کی عدالت نے تحریک انصاف کے سربراہ کیخلاف فرد جرم کی کاروائی بھی موخر کر دی۔ توشہ خانہ کیس کی آئندہ سماعت 30 مارچ کو ہو گی، سماعت میں کیس کے قابل سماعت ہونے یا نہ ہونے سے متعلق دلائل دیے جائیں گے۔ اس سے قبل سیشن جج ظفر اقبال نے عمران خان کی حاضری گاڑی میں لگانے کی اجازت دی۔

(جاری ہے)

جج نے ریمارکس دئیے کہ عمران خان سے حاضری کے دستخط ان کی گاڑی میں لے لیے جائیں۔

جج نے استفسار کیا اگر حاضری گاڑی میں لگا دی جائے تو دیگر سماعت کا کیا کیا جائے۔ عدالت نے کہا کہ آج سماعت ممکن نہیں، عمران خان کے دستخط لیں اور انہیں کہیں کے چلے جائیں۔ خیال رہے کہ پاکستان تحریک انصاف کے سربراہ عمران خان کی گاڑی جوڈیشل کمپلیکس میں داخل ہونے کے بعد پی ٹی آئی کارکنان کی جانب سے پولیس پر پتھراؤ کیا گیا جبکہ پولیس کی جانب سے کارکنان پر لاٹھی چارج کیا گیا۔

پولیس کی جانب سے پاکستان تحریک انصاف کے سینئر رہنما شبلی فراز، مراد سعید اور فرخ حبیب پر بھی لاٹھی چارج کیا گیا۔ذرائع کے مطابق شبلی فراز کے سر پر لاٹھی لگ گئی۔لاٹھی لگنے سے متعدد کارکنان زخمی ہو گئے۔جبکہ آنسو گیس کی شیلنگ سے جوڈیشل کمپلیکس کے باہر دھوئیں کے بادل چھا گئے،پی ٹی آئی کارکنوں نے بم اسکواڈ کی گاڑی پر بھی دھاوا بولا۔

آئی جی اسلام آباد اکبر ناصر خان کے مطابق عمران خان کا قافلہ جوڈیشل کمپلیکس کے قریب تھا کہ کارکنوں نے پتھراؤ کر دیا۔پولیس غیر مسلح ہے اور کسی قسم کا کوئی تشدد نہیں کیا جارہا،ہماری ایک چوکی پر آگ لگا دی۔ دوسری جانب چئیرمین پی ٹی آئی عمران خان کی گرفتاری کے خدشے کے باعث اسلام آباد ہائیکورٹ میں درخواست دائر کی گئی۔ درخواست میں استدعا کی گئی کہ نیب سمیت کسی بھی ادارے کو گرفتاری سے روکا جائے۔