نصرت بھٹو ممتاز سیاسی شخصیت اور انسانی حقوق کی سرکردہ وکیل تھیں، شیری رحمان

جمعرات 23 مارچ 2023 23:13

اسلام آباد (اُردو پوائنٹ اخبارتازہ ترین - این این آئی۔ 23 مارچ2023ء) پاکستان پیپلز پارٹی کی مرکزی رہنما اور سینیٹر شیری رحمان نے کہا ہے کہ بیگم نصرت بھٹو پاکستانی سیاست کی ایک ممتاز شخصیت اور جمہوریت اور انسانی حقوق کی سرکردہ وکیل تھیں۔

(جاری ہے)

سماجی رابطے کی ویب سائٹ ٹوئٹر پر اپنے پیغام میں رہنما پیپلز پارٹی شیری رحمان نے کہا کہ مادر جمہوریت بیگم نصرت بھٹو کو 94 ویں سالگرہ کے موقع پر ان کو خراج عقیدت پیش کرتی ہوں، بیگم بھٹو نے آمریت میں فعال سیاسی کردار ادا کیا اور پوری زندگی پرعزم رہیں، ان کو ضیاء کی آمریت کے دوران قید و بند کی سختیاں برداشت کرنی پڑیں۔

شیری رحمان نے کہا کہ بیگم نصرت بھٹو نے اپنی زندگی میں متعدد چیلنجز کا سامنا کیا جن میں اپنے شوہر کی قید، پھانسی اور بیٹوں کے قتل بھی شامل ہیں، ان تمام سانحات کے باوجود وہ ایک مضبوط اور بہادر شخصیت رہیں۔انہوںنے کہاکہ بیگم نصرت بھٹو کا کردار اور لیگیسی پاکستان اور دنیا بھر میں بہت سے لوگوں کو متاثر کرتی ہے، ان کی 94ویں سالگرہ پر ہم ان کی ملک، عوام، آئین، جمہوریت اور انسانی حقوق کیلئے خدمات کو سلام پیش کرتے ہیں اور ان کی قربانیوں کا احترام کرتے ہیں۔