عمران خان کی قیادت میں ملک بچانے کی جدوجہد کررہے ہیں،شاہ محمودقریشی

ملتان(اُردو پوائنٹ اخبارتازہ ترین - این این آئی۔ 06 اپریل2023ء) پاکستان تحریک انصاف کے وائس چیئرمین مخدوم شاہ محمود قریشی نے کہا ہے کہ تحریک انصاف کے چیئرمین عمران خان کی قیادت میں ملک بچانے کی جدوجہد کررہے ہیں،امپورٹڈ حکمران عمران خان کی مقبولیت سے گھبرا چکے ہیں اورانتخابات سے راہ فرار اختیار کررہے ہیں،یہ لوگ انتخابات میں جتنا التواء کریں گے عمران خان کی مقبولیت میں اتنا اضافہ ہوگا اور امپورٹڈ حکمرانوں کی مقبولیت میں اتنی کمی ہوگی،پاکستان تحریک انصاف آئندہ انتخابات میں کلین سویپ کرے گی،2018ء میں تحریک انصاف نے ملک بھر میں تاریخی کامیابی حاصل کی اور اب ایک بارپھر عوام کے ووٹوں کی طاقت سے تحریک انصاف کو ایک بار پھر تاریخی کامیابی ملے گی،امپورٹڈ حکمرانوں کا بوریا بستر گول ہونے والا ہے۔

(جاری ہے)

ان خیالات کا اظہار انہوں نے گزشتہ روز یونین کونسل جھوک لشکر پور میں سابق چیئرمین مہر اشفاق ہانسلہ کے ڈیرے پر این اے 157کے ایف پی جی گروپ(فرینڈز پولیٹکل گروپ) کے ممبران سے ملاقات کرتے ہوئے کیا۔ سابق رکن قومی و صوبائی اسمبلی مخدومزادہ زین حسین قریشی‘ سابق صوبائی وزیر ڈاکٹر اختر ملک بھی اس موقع پر موجود تھے۔ انہوں نے کہا ملکی معیشت بحرانو ں کی زد میں ہے،ملک کا ہر طبقہ معاشی حالات کی وجہ سے پریشان ہے،ملک مسائل کی دلدل میں دھنستا جا رہا ہے، حکمرانو ں کو عوامی مسائل اور عوام کی کوئی پرواہ نہیں، انہیں اپنے مفادات سے غرض ہے،امپورٹڈ حکمران مفادات کی سیاست کررہے ہیں،عمران خان اپنی ذات کے لئے نہیں قوم کی آئندہ آنے والی نسلوں کی جنگ لڑ رہے ہیں،وقت آگیا ہے قوم کو ملک بچانے کے لئے عمران خان کاساتھ دینا ہوگا،بلے پر ٹھپہ لگا کر تحریک انصاف کو کامیابی دلانا ہوگی۔

انہوں نے کہاکہ این اے 157 تحریک انصاف کا گڑھ تھا،ہے اور رہے گا۔یہاں کی عوام نے ماضی میں بھی تحریک انصاف کو بھر پور کامیابی دلائی اور آئندہ بھی تحریک انصاف کو بھر پو رکامیابی سے نوازیں گے۔انہوں نے کہاکہ این ا ی157کی عوام باشعور ہیں انہیں پتہ ہے کون لوگ حلقے کی ترقی کے لئے مخلص ہیں۔ یہاں کی عوام نے مجھے اور میرے صاحبزاد ے کو عزت دی اوراپنا نمائندہ منتخب کیا۔

ہم نے حلقے کی نمائندگی کا حق ادا کیا۔ عوام نے آئندہ بھی موقع دیا تو حلقے کی ترقی کا سفر اسی جوش و جذبہ سے جاری رکھیں گے۔ دوران اقتدار این اے 157میں اربوں روپے کے ترقیاتی منصوبے مکمل کروائے۔ ہمارے مد مقابل سیاسی شخصیت نے حلقے میں ترقیاتی کام کروائے ہیں تو سامنے لائیں۔ مخدوم شاہ محمود قریشی نے ایف پی جی گروپ کے ممبران سے ملاقات میں ملکی سیاسی صورتحال پر تفصیلی گفتگو کی۔ اس موقع پر تمام ممبران نے مخدوم شاہ محمود قریشی کی قیادت پر بھر پور اعتماد کا اعلان کیا اور آئندہ انتخابات میں این اے 157 میں تحریک انصاف کے امیدوار کی کامیابی کے لئے بھر پور جدوجہد کرنے کا اعادہ کیا۔