ایم کیوایم اور پیپلزپارٹی نے کراچی سے ایک سیٹ نہیں جیتی لیکن مقتدرہ نے تمام سیٹیں بانٹ دیں

ایم کیوایم اور پیپلزپارٹی 40 برس سے کراچی کو لوٹ رہی ہیں، مقتدرہ نے اس سسٹم کو ختم کرنے کا اعلان کیا تھا، کراچی میں نالوں کی صفائی کی بجائے کاغذوں میں لکھ کر کروڑوں کا غبن ہوگا، امیر جماعت اسلامی حافظ نعیم الرحمن

ثنااللہ ناگرہ بدھ 20 اگست 2025 23:34

ایم کیوایم اور پیپلزپارٹی نے کراچی سے ایک سیٹ نہیں جیتی لیکن مقتدرہ ..

لاہور (اُردو پوائنٹ اخبارتازہ ترین۔ 20 اگست 2025ء) امیر جماعت اسلامی حافظ نعیم الرحمن نے کہا ہے کہ ایم کیوایم اور پیپلز پارٹی نے کراچی سے ایک سیٹ نہیں جیتی لیکن مقتدرہ نے تمام سیٹیں بانٹ دیں، ایم کیو ایم اور پیپلزپارٹی 40 برس سے کراچی کو لوٹ رہی ہیں، مقتدرہ نے اس سسٹم کو ختم کرنے کا اعلان کیا تھا، کراچی میں نالوں کی صفائی کی بجائے کاغذوں میں لکھ کر کروڑوں کا غبن ہوگا۔

امیر جماعت اسلامی حافظ نعیم الرحمن نے منصورہ میں تربیت گاہ کے شرکا سے خطاب کرتے ہوئے کہا کہ 26ویں ترمیم کے بعد ملک میں عدالتی نظام ناکارہ ہو چکا ہے، عام آدمی انصاف کے لیے دھکے کھا رہا ہے، جو پہلے ہی اتنے بے باک ہیں کہ جس کو چاہیں اٹھا لیتے ہیں انھیں انسداد دہشت گردی قانون سے اندھی طاقت دے دی گئی۔

(جاری ہے)

امیر جماعت اسلامی نے کہا کہ سسٹم کو طاقت کے ذریعے کنٹرول کیا جارہا ہے، 26ویں ترمیم پاس کرانے والی تمام سیاسی پارٹیاں قوم کی مجرم ہیں۔

حافظ نعیم الرحمن کا کہنا تھا کہ آئین کے مطابق ملک میں اسلام کے خلاف کوئی قانون سازی نہیں ہوسکتی تاہم ملک کا پورا نظام بھلے یہ عدالتی ہے یا انتظامی اسلام کے عادلانہ نظام کے تصور کے مطابق نہیں۔ انتظامی امور کی مثال دیتے ہوئے انہوں نے کراچی میں حالیہ بارشوں سے ہونے والی تباہی کا ذکر کیا اور کہا کہ جب عوامی خواہشات کے برعکس لوگ نظام پر مسلط کردیے جاتے ہیں تو وہ عوام کو خوش کرنے کی بجائے کسی اور کی رضا کے لئے مصروف رہتے ہیں۔

ایم کیو ایم اور سندھ کی حکمران پارٹی کراچی سے ایک سیٹ نہیں جیتی، تاہم مقتدرہ نے دونوں میں تمام سیٹیں بانٹ دیں اور قبضہ میئر بھی مسلط کردیا۔ بلاشبہ کراچی میں تیز بارش ہوئی تاہم جب نالوں کی صفائی کی بجائے کاغذوں میں صفائی لکھ کر کروڑوں کا غبن ہوگا، سڑکیں ٹھیک نہیں ہوں گی تو بڑی تباہی کو کیسے روکا جاسکتا ہی انہوں نے کہا کہ ایم کیو ایم اور پیپلز پارٹی چالیس برس سے کراچی کو لوٹ رہی ہیں، مقتدرہ نے’’سسٹم‘‘ کو ختم کرنے کا اعلان کیا تھا تاہم اس سسٹم کو اٹھا کر وسیع تر قومی مفاد میں اسلام آباد میں بٹھا دیا گیا۔

انھوں نے کہا کہ یہ وسیع تر قومی مفاد ہرگز قوم کے مفاد میں نہیں ہے۔ امیر جماعت اسلامی نے خیبر پختونخواہ میں سیلاب اور بارشوں سے ہونے والی تباہی پر تحریک انصاف کی کارکردگی پر سوال اٹھایا اور کہا کہ وفاقی و صوبائی حکومتیں موسمیاتی تبدیلیوں کے پیش نظر جدید موسمیاتی آلات سے فائدہ اٹھا کر عوام کو پہلے سے باخبر کرنے میں کیوں ناکام ہیں، یہ عالمی سطح پر موسمیاتی تبدیلیوں کے شکار پاکستان کا مقدمہ عالمی طاقتوں کے سامنے مؤثر طریقے سے پیش کیوں نہیں کرسکتیں۔