ملک کی صرافہ مارکیٹوں میں سونے کی فی تولہ قیمت میں 2 ہزار 500 روپے کمی ہوگئی

آج فی تولہ سونے کی قیمت میں 1400 روپے جبکہ گزشتہ روز 1100 روپے کمی ہوئی، 24 قیراط سونے کی قیمت کم ہوکر 3 لاکھ 55 ہزار 200 روپے کی سطح پر آگئی ہے

ثنااللہ ناگرہ بدھ 20 اگست 2025 19:49

ملک کی صرافہ مارکیٹوں میں سونے کی فی تولہ قیمت میں 2 ہزار 500 روپے کمی ..

کراچی ( اردوپوائنٹ اخبار تازہ ترین۔ آئی پی اے ۔ 20 اگست 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی سونے کی قیمتوں میں نمایاں اضافہ ہوا، لیکن آج سونے کی قیمت میں بڑی کمی ہوگئی ہے۔ میڈیا رپورٹ کے مطابق عالمی مارکیٹ میں سونے کی قیمتوں میں کمی ہونے کے باعث پاکستان میں بھی سونے کی قیمت کم ہو گئی ہے۔

دو روز میں سونے کی فی تولہ قیمت میں 2 ہزار 500 روپے کی کمی ہوئی ہے۔ آج سونے کی قیمت میں ایک ہزار 400 روپے کمی ہوگئی ہے، فی تولہ سونے کی قیمت کم ہونے کے بعد مقامی صرافہ بازاروں میں نئی قیمت 3 لاکھ 55 ہزار 200 ہزار روپے ہوگئی ہے۔ اسی طرح دس گرام سونے کی قیمت بھی کم ہوگئی ہے۔ 10 گرام سونے کی قیمت میں ایک ہزار 201 روپے کی کمی ہوئی ہے۔

(جاری ہے)

دس گرام سونے کی نئی قیمت 3 لاکھ 4 ہزار 526 روپے کی سطح پر آ گئی ہے۔

یاد رہے عالمی مارکیٹ میں سونے کا بھاؤ 14 ڈالر کی کمی کے بعد 3 ہزار 325 ڈالر فی اونس ہو گیا ہے۔ دوسری جانب پاکستان کی انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔سٹیٹ بینک آف پاکستان کے مطابق بدھ کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 01 پیسے کا اضافہ ریکارڈ کیا گیا ہے جس کے بعد اس کی نئی قیمت 281 روپے 95 پیسے ہو گئی ہے۔

انٹربینک مارکیٹ میں سعودی ریال کی قدر 75 روپے 13 پیسے جبکہ بحرینی دینار کی قدر 747 روپے 86 پیسے رہی۔اسی طرح عمانی ریال کی انٹربینک مارکیٹ میں قدر 732 روپے 31 پیسے رہی، کویتی دینار کی قدر 922 روپے 34 پیسے اور قطری ریال کی قدر 77 روپے 35 پیسے ریکارڈ کی گئی۔ اسی طرح اوپن مارکیٹ میں امریکی ڈالر کی قیمت خرید 284 روپے اور قیمت فروخت 284 روپے 50 پیسے ریکارڈ کی گئی۔