عثمان بزدار ایک مرتبہ پھر نیب کے ریڈار پر آ گئے، 5 جون کو طلبی نوٹس جاری

جمعرات 1 جون 2023 21:54

لاہور (اُردو پوائنٹ اخبارتازہ ترین - آن لائن۔ 01 جون2023ء) سابق وزیراعلیٰ پنجاب سردار عثمان بزدار ایک مرتبہ پھر نیب کے ریڈار پر آ گئے ہیں، نیب نے عثمان بزدار کو آمدن سے زائد اثاثہ جات انکوائری میں دسویں مرتبہ طلب کرتے ہوئے 5 جون کو پیش ہونے کا نوٹس جاری کر دیا ہے۔ بتایا گیا ہے کہ نیب کی جانب سے تحقیقات کیلئے بارہا طلبی پر عثمان بزدار صرف 2 مرتبہ پیش ہوئے ہیں۔

31 مئی کو جاری کردہ نیب طلبی کے نوٹس ان کی لاہور اور آبائی رہائش گاہ ڈی جی خان ارسال کئے گئے ہیں۔

(جاری ہے)

ذرائع کے مطابق سردار عثمان بزدار نیب تفتیش میں تعاون نہیں کر رہے، نیب عثمان بزدار کیخلاف مجموعی طور پر 9 ارب سے زائد مالیت کے اثاثہ جات بنانے پر تحقیقات کر رہا ہے۔ذرائع کے مطابق عثمان بزدار نے تاحال ایسٹ ڈکلیریشن پروفارمہ پر مکمل تفصیلات نیب کو فراہم نہیں کیں جس پر نیب ٹیم کو تشویش ہے۔

سابق وزیر اعلیٰ پنجاب کیخلاف اہم پیش رفت کے طور پر نیب نے محکمہ سی اینڈ ڈبلیو سے عثمان بزدار دور کے تمام منصوبہ جات کی تفصیلات بھی 5 جون تک طلب کر لی ہیں۔عثمان بزدار کی جانب سے عدم تعاون کی صورت میں تادیبی کارروائی پر بھی غور کیا جا رہا ہے۔نیب ٹیم نے آخری مرتبہ عثمان بزدار کو 30 مئی کو طلب کیا تھا لیکن وہ بیماری کے باعث پیش نہ ہو ہوئے تھے۔