چودھری پرویزالٰہی گلگت بلتستان فرار ہو رہے تھے، ڈرائیور کا پولیس کو بیان

لاہور (اردوپوائنٹ اخبارتازہ ترین ۔ یکم جون 2023ء) صدر پی ٹی آئی چودھری پرویزالٰہی کے ڈرائیور نے پولیس کو بیان دیا کہ پرویز الٰہی گلگت بلتستان فرار ہو رہے تھے۔ جیو نیوز کے مطابق چودھری پرویزالٰہی کے ڈرائیور نے پولیس کو بیان دیا کہ چودھری پرویزالٰہی گلگت بلتستان فرار ہو رہے تھے۔پولیس کا کہنا ہے کہ پرویزالٰہی گھر سے چار گاڑیوں کے قافلے کے ساتھ نکل رہے تھے۔

دو گاڑیوں میں بچے اور خواتین سوار تھے جنہیں چیک بھی کیا گیا۔ جس گاڑی میں پرویزالٰہی سوار تھے وہ بلٹ پروف تھی۔ گاڑی کو چیکنگ کیلئے پولیس نے روکا تو ڈرائیور نے دروازہ نہیں کھولا۔ دروازہ نہ کھولنے پر پولیس کو شک ہوا، جس پر گاڑی کا شیشہ توڑنے کی کوشش کی۔ پرویزالٰہی گاڑی سے خود باہر آئے اور اپنی گاڑی پر جانے کا اصرار کیا۔

(جاری ہے)

یاد رہے پاکستان تحریک انصاف کے مرکزی صدر چودھری پرویزالٰہی کو پولیس نے گرفتار کرلیا ہے۔

پولیس ان کی ضمانت خارج ہونے پر گرفتاری کیلئے چھاپے مار رہی تھی ، جبکہ چودھری پرویزالٰہی کچھ روز سے روپوش تھے۔ اس سے قبل پولیس نے ان کے گھر کے سامنے سکول کی بھی تلاشی لی تھی، پولیس کو موبائل لوکیشن مل رہی تھی کہ وہ اسی علاقے میں موجود ہیں، پولیس نے ان کی گرفتاری کیلئے وہاں ناکہ لگایا ہوا تھا۔ تاہم چودھری پرویزالٰہی آج جب ظہور الٰہی روڈ پراپنے گھر سے نکل کر گاڑی میں جارہے تھے کہ پولیس نے گاڑی روک کر انہیں گرفتار کیا ہے۔

چودھری پرویزالٰہی کو ان کے گھر کے قریب سے گرفتار کیا گیا۔ یاد رہے چودھری پرویزالٰہی کیخلاف کرپشن کے مقدمات تھے، پرویزالٰہی پر ترقیاتی اسکیموں میں کک بیکس لینے کے الزامات ہیں۔ چودھری پرویزالٰہی اینٹی کرپشن کورٹ میں پیش نہیں ہوئے تھے، گوجرانوالہ کی اینٹی کرپشن عدالت نے ان کی عبوری ضمانت خارج کی تھی۔ عدالت نے انہیں گرفتار کرکے 2جون کو پیش کرنے کا حکم دیا تھا۔

نگران وزیراطلاعات عامر میر نے اپنے مئوقف میں کہا کہ چودھری پرویزالٰہی کو پولیس نے گرفتار کرلیا ہے، پرویزالٰہی گھر سے فرار ہوتے ہوئے پکڑے گئے، وہ اینٹی کرپشن کیس میں پولیس کو مطلوب تھے اور مفرور تھے،آج گھر سے دو گاڑیاں نکلیں ایک گاڑی میں پرویزالٰہی تھے اور دوسری گاڑی میں خواتین تھیں، پولیس نے گاڑی کو ناکے پر روکا کہ چیک کرنی ہے، ان کی گاڑی بلٹ پروف تھی وہ گاڑی کا دروازہ نہیں کھول رہے تھے۔

چودھری پرویزالٰہی نے آج بھی گرفتاری نہ دینے کی مزاحمت کی، مزاحمت کرنے پر ڈرائیور سائیڈ کا شیشہ توڑا گیا تو اندر سے پرویزالٰہی برآمد ہوئے۔ چودھری پرویزالٰہی چھپنے کے ماہر ہیں وہ آج فرار ہوتے پکڑے گئے، اگر وہ گھر سے باہر نہ نکلتے تو شاید کچھ اور دن نہ پکڑے جاتے۔ جب انہیں گرفتار کرنے کی پہلی کوشش کی گئی تو بڑی بدمزگی ہوگئی تھی ، توڑ پھوڑ ہنگامہ آرائی ہوئی تھی۔اس حوالے سے ڈی جی اینٹی کرپشن کیس کی رپورٹ دیں گے۔ ان کو اینٹی کرپشن کیس میں گرفتار کیا گیا ہے۔ انہوں نے کہا کہ چودھری مونس الٰہی بھی کیسز میں مطلوب ہیں،ان کو تفتیش کیلئے بلایا جاتا ہے لیکن وہ یورپ میں مقیم ہیں۔