لاہورہائیکورٹ کا چودھری پرویز الٰہی کو جیل میں سہولیات فراہم کرنے کا حکم

منگل 6 جون 2023 22:51

لاہورہائیکورٹ کا چودھری پرویز الٰہی کو جیل میں سہولیات فراہم کرنے ..
لاہور (اُردو پوائنٹ اخبارتازہ ترین - آن لائن۔ 06 جون2023ء) لاہور ہائی کورٹ نے سپرنٹنڈنٹ کیمپ جیل کو سابق وزیراعلی پنجاب چودھری پرویز الٰہی کو سہولتیں فراہم کرنے کا حکم دے دیا۔لاہور ہائی کورٹ کے جسٹس وحید خان نے پرویز الٰہی کے بیٹے راسخ الٰہی کی پرویز الٰہی کو جیل میں سہولیات فراہمی کی درخواست پر سماعت کی، درخواست گزار کی طرف سے آصف چیمہ ایڈووکیٹ پیش ہوئے۔

(جاری ہے)

درخواست میں موقف اپنایا گیا کہ پرویز الٰہی سابق وزیر اعلیٰ پنجاب اور سینئر سیاستدان ہیں، پولیس نے پرویز الٰہی کو جھوٹے کیس میں گرفتار کر کے جیل منتقل کیا، جیل میں پرویز الٰہی کو ان کے اسٹیٹس کے مطابق سہولیات فراہم نہیں کی جا رہیں۔درخواست میں کہا گیا کہ پرویز الٰہی کو پرہیزی کھانا، ادویات و دیگر فراہم نہیں کرنے دی جا رہیں، عدالت جیل میں سابق وزیر اعلیٰ پنجاب کو سہولیات فراہم کرنے کا حکم جاری کرے۔عدالت نے سپرنٹنڈنٹ کیمپ جیل کو سابق وزیراعلی کو سہولیات فراہم کرنے کی ہدایات جاری کرتے ہوئے درخواست نمٹا دی۔