سی ٹی ڈی پنجاب نے آپریشنز کے دوران کالعدم تنظیموں کے9مبینہ دہشت گردوں کو گرفتار کر لیا،ترجمان

ہفتہ 10 جون 2023 14:24

لاہور (اُردو پوائنٹ اخبارتازہ ترین - اے پی پی۔ 10 جون2023ء) کائونٹر ٹیررازم ڈیپارٹمنٹ (سی ٹی ڈی)پنجاب نے آپریشنز کے دوران کالعدم تنظیموں کے9مبینہ دہشت گردوں کو گرفتار کر لیا۔ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعہ سے نمٹنے کے لیے صوبہ بھر کے مختلف اضلاع میں 46خفیہ آپریشنز کئے جن کے دوران47مشتبہ افراد سے پوچھ گچھ کی گئی اور9مبینہ دہشت گردوں کو گرفتار کرکر کے ان کے قبضہ سے اسلحہ دھماکہ خیز و دیگر ممنوعہ مواد برآمد کر لیاگیا۔

گرفتار ہونے والے دہشت گردوں میں تحریک طالبان پاکستان کے 6ارکان عتیق احمد، رشید خان، محمد ریاض، محمد صدیق خان، محمد شعیب اورزاہد خان جبکہ القاعدہ کے 2ارکان محمد رحیق اورکاشف عثمانی اور لشکر جھنگوی کا ایک رکن مقصود احمدشامل ہیں۔

(جاری ہے)

ترجمان نے بتایا کہ دہشتگردوں کے قبضے سے 1328 دھماکہ خیز مواد،ڈیٹونیٹر 10عدد، حفاظتی فیوز تار 17فٹ، ممنوعہ کتابیں 6عدد، ممنوعہ میگزین 11عدد، کالعدم تنظیم کے 56 پمفلٹس،100 سٹیکرز،5کی رسید بکس اور41170روپے نقدی برآمد کی گئی۔

ترجمان نے کہاکہ دہشتگردوں نے صوبہ بھر میں تخریب کاری کا منصوبہ بنا رکھا تھا اور وہ اہم تنصیبات پر دہشتگردانہ کاروائی اور مذہبی مقامات کو ٹارگٹ کرنا چاہتے تھے،گرفتار مبینہ دہشتگردوں کے خلاف راولپنڈی، سرگودھاساہیوال ملتان ،گوجرانوالہ اوربہاولپورمیں 9ایف آئی آرز درج کر کے تفتیش کے لیے نامعلوم مقام پر منتقل کر دیا گیا ہے۔ترجمان نے مزید کہا کہ رواں ہفتے کے دوران مقامی پولیس اور سکیورٹی اداروں کی مدد سے سی ٹی ڈی پنجاب نے284کومبنگ آپریشنز کئے جس کے دوران13949افراد کو چیک کیا گیا56مشتبہ افراد کو گرفتار32 ایف آئی آرز درج جبکہ17بازیابیاں کی گئیں۔

انہوں نے کہا کہ سی ٹی ڈی پنجاب پوری مستعدی سے محفوظ پنجاب کے اپنے ہدف پر عمل پیرا ہے اوردہشت گردی کے ناسور کو جڑ سے اکھاڑ پھینکنے کے لیے پرعزم ہے،دہشت گردوں اور ریاست دشمن عناصر کو سلاخوں کے پیچھے پہنچانے کی کوششوں میں کوئی کسر نہیں چھوڑی جائے گی۔انہوں نے عوام سے اپیل کی کہ دہشت گردی سے متعلق کسی بھی معلومات کی صورت میں سی ٹی ڈی پنجاب کی ہیلپ لائن 0800-11111 پر اطلاع کریں۔