عید الضحیٰ کے تمام ترانتظامات مکمل ،ضلعی ،تحصیل کی سطح پر قائم 07 کنٹرول روم مکمل فعال کر دیئے گئے‘ڈپٹی کمشنر ننکانہ

ننکانہ صاحب (اُردو پوائنٹ اخبارتازہ ترین - این این آئی۔ 28 جون2023ء) نگران وزیر اعلیٰ پنجاب سید محسن نقوی کی خصوصی ہدایت پرضلع ننکانہ صاحب میںعید الضحیٰ کے تمام ترانتظامات کو جامع پلان کے تحت حتمی شکل دے دی گئی ہے،ضلعی اور تحصیل کی سطح پر قائم کیے گئی07 کنٹرول روم مکمل فعال کردیے گئے ہیں،جانوروں کی آلائشیں اور کوڑاکرکٹ اٹھانے کے لیے 14سوسے زائد عملہ اپنی ڈیوٹیاں انجام دے گا،شہری جانوروں کی آلائشیں اپنے دروازے کے باہر رکھ دیں جہاں سے ہمارا عملہ اٹھالے گا۔

ڈپٹی کمشنر ننکانہ صاحب میاں رفیق احسن نے ان خیالات کا اظہار عید الضحیٰ کے سلسلہ میں قائم مویشی منڈیوں،صفائی ستھرائی اور جانوروں کی آلائشیں اٹھانے کے حوالے سے پرنٹ والیکٹرانک میڈیا نمائندگان سے میڈیا بریفنگ کے دوران کیا۔

(جاری ہے)

اسسٹنٹ کمشنر ننکانہ اللہ توکل وٹو،چیف آفیسر ضلع کونسل ساجد مشرف،ڈپٹی ڈائریکٹر لوکل گورنمنٹ شہزاد اکرم ،چیف آفیسر میونسپل کمیٹی رائو انوار سمیت پرنٹ والیکٹرانک میڈیا نمائندگان بھی اس موقع پر موجودتھے ۔

ڈپٹی کمشنر ننکانہ میاں رفیق احسن نے میڈیا بریفنگ دیتے ہوئے بتایا کہ عید کے ایام میںقربانی کے جانوروں کی آلائشوں کو ٹھکانے لگانے کے لیے ضلع بھرمیں مجموعی طور پر 70ڈمپنگ پوائنٹس ،325کولیکشن پوائنٹس بنائے گئے ہیں جبکہ350سے زائد رکشہ اور ٹریکٹر ٹرالیوں کے ذریعے آلائشیں اٹھانے کے لیے تقریباً14سو سے زائد اہلکاران اپنی ڈیوٹی انجام دیں گے جن کی کارکردگی کو مانیٹرکرنے کے لیے میرے سمیت تمام متعلقہ افسران فیلڈمیں موجود ہونگے ۔

ڈپٹی کمشنر ننکانہ میاں رفیق احسن نے کہا کہ میونسپل اداروں کی سربراہی میں عید گاہوں ، مساجد، شہروں اورقصبوں سمیت دیہاتوں میں بھی صفائی ستھرائی کے خصوصی انتظامات کیے گے ہیں۔ڈپٹی کمشنر ننکانہ صاحب نے مزید کہا کہ عید کے ایام میں تمام ضلعی محکمہ جات کے افسرا ن و اہلکاران فیلڈ میں اپنی حاضری کو سوفیصد یقینی بنائیں،پرائس مجسٹریٹس مارکیٹوں بازاروں میں متحرک نظر آئیں اور عوام الناس کو سرکاری نرخوں پر اشیائے ضروریہ کی فراہمی یقینی بنانے کے لیے اپنی ذمہ داریوں کو قومی فریضہ سمجھ کر اداکریں۔

انہوں نے مزید کہا کہ عوامی مقامات پر سری پائے بھوننے والوں کے خلاف ضلع بھر میں دفعہ 144نافذ العمل ہے اگرکوئی بھی شخص حکومتی احکامات کی خلاف ورزی کرتاہوا پکڑاگیا تو اس کے خلاف سخت قانونی کاروائی عمل میں لائی جائے گی۔بعدازاں ڈپٹی کمشنر ننکانہ میاں رفیق احسن نے اے ڈی سی آر مزمل الیاس،اسسٹنٹ کمشنر ننکانہ اللہ توکل وٹو، سی او ضلع کونسل ساجد مشرف ودیگر ضلعی افسران کے ہمراہ سپرنگ ویلی ننکانہ میں قائم کی گئی مویشی منڈی میں خریداروں اور بیوپاریوں کو مہیا کی جانے والی سہولیات کا تفصیلی جائزہ لیا۔