الیکشن کا التوا قابل قبول نہیں، اس کی بھر پور مزاحمت اورملک گیراحتجاج کیاجائیگا،جماعت اسلامی رہنماء ملک کامران

بدھ 16 اگست 2023 23:08

بہاول پور(اُردو پوائنٹ اخبارتازہ ترین - آن لائن۔ 16 اگست2023ء) جماعت اسلامی کے رہنماء و امیدوار این اے 168 ملک کامران نے کہا ہے کہ الیکشن کا التوا قابل قبول نہیں ہے اس کی بھر پور مزاحمت اورملک گیراحتجاج کیاجائیگا ۔ نگران حکومت کا بنیادی مقصد اورترجیح انتخابی عمل بروقت اور شفاف بنانا ہے۔جماعت اسلامی عوام کا مقدمہ لڑ رہی ہے۔ عوام ہمارا ساتھ د یں تو ملک وقوم کی تقدیر بدل کر رکھ دیں گے ۔

انہوں نے کہا کہ نگراں حکومتوں کا مقصد تمام سیاسی جماعتوں کو یکساں مواقع فراہم کرنا ہے، نگران وزیر اعظم کو کابینہ کا حجم مختصر رکھتے ہوئے اپنی توجہ قومی و آئینی ذمہ داری ادا کرنے پر مرکوز کر نی چاہئے ۔ اس وقت ملک قوم کو محب وطن قیادت کے فقدان کا سامنا ہے ۔ ایماندار قیادت کی جتنی ضرورت آج ہے شاید اس طرح کی ضرورت کبھی ماضی میں اتنی شدت سے محسوس نہیں کی گئی۔

(جاری ہے)

ان کا کہنا تھا کہ پی ٹی آئی اور پی ڈی ایم کی حکومتوں کی مایوس کن پالیسیوں کی بدولت پاکستان بری طرح مسائل کے گرداب میں پھنسا ہوا ہے، سیاسی، معاشی، معاشرتی، سماجی بحران نے بدترین صورت اختیار کر لی ہے۔ ملک کے اوپر قرضوں کا بوجھ ، بین الاقوامی سطح پر پاکستان کے خلاف بیان بازی اور پروپیگنڈہ دیکھ کر لگتا ہے کہ جیسے ملک کو سنبھالنے والوںکی اپنی ترجیحات ہی نہیں تھیں ۔

انہوں نے کہا کہ موجودہ فرسودہ اور استحصالی نظام سے چھٹکارہ حاصل کرنا ہو گا۔ پی ٹی آئی اور پی ڈی ایم دونوں نے عوام کو مایوسی کے سواکچھ نہیں دیا۔ آئی ایم ایف کے غلام حکمرانوں نے اپنی عیاشیوں، پروٹوکو ل اور دیگر اللوں تللوں کیلیے سخت ترین شرائط پر قرضے حاصل کیے اور ہر پاکستانی کو ڈھائی لاکھ کا مقروض کر دیا ہے۔انہوں نے مزید کہا کہ پاکستان کو آزادی حاصل کئے 76برس ہو چکے ، مگر بد قسمتی سے آج بھی مٹھی بھر اشرافیہ نے 24کروڑ عوام کویرغمال بنایا ہوا ہے ۔