فیصل آباد بورڈ نے انٹرمیڈیٹ پارٹ ٹوکے نتائج کا اعلان کردیا،کل99874میں سے65837پاس ہوئے، کامیابی کا تناسب 65.92 فیصد رہا

فیصل آباد (اُردو پوائنٹ اخبارتازہ ترین - اے پی پی۔ 13 ستمبر2023ء) بورڈ آف انٹرمیڈیٹ اینڈ سیکنڈری ایجوکیشن فیصل آباد نے بدھ کی صبح انٹرمیڈیٹ پارٹ ٹو(سیکنڈ ایئر/بارہویں جماعت)کے سالانہ امتحان2023 کے نتائج کا اعلان کردیاجس میں کل99874 طلباوطالبات میں سے 65837پاس ہوئے اس طرح کامیابی کا تناسب 65.92 فیصد رہا۔نتائج کی سادہ وپروقار تقریب کمشنروچیئرپرسن تعلیمی بورڈ فیصل آباد سلوت سعید کی زیرصدارت میونسپل کارپوریشن کمپلیکس میں منعقد ہوئی جس میں سیکرٹری بورڈ ڈاکٹر حبیب الرحمن،کنٹرولر امتحانات ڈاکٹر محمد جعفر علی،پی آراو بورڈ رضوان احمد جوئیہ،پی ایس ٹو چیئرپرسن احسان احمد،آفتاب احمداور ساجد حسین نقوی کے علاوہ دیگر متعلقہ افسران شریک ہوئے۔

حکومت پنجاب کی ہدایات کے مطابق صبح 10 بجے چیئرپرسن تعلیمی بورڈ فیصل آباد سلوت سعید نے بٹن دبا کر رزلٹ آن لائن کیا جس کے ساتھ ہی رزلٹ بورڈ کی ویب سائٹ www.bisefsd.edu.pk پراپ لوڈ ہو گیا ہے ۔

(جاری ہے)

اس موقع پر کنٹرولر امتحانات ڈاکٹر محمد جعفر علی نے بتایا کہ امتحان انٹرمیڈیٹ پارٹ سیکنڈو کمپوزٹ سالانہ (اول)2023میں کل99874طلباوطالبات شریک ہوئے جن میں سے 65837پاس ہوئے اور یوں کامیابی کا تناسب 65.92فیصد رہا۔

انہوں نے بتایا کہ فیصل آباد،جھنگ،ٹوبہ ٹیک سنگھ اور چنیوٹ اضلاع کے طلباوطالبات کیلئے ان کے گھروں کے نزدیک 360 الگ الگ امتحانی مراکز قائم کئے گئے تھے تاکہ امیدواران کو امتحانی مراکز پہنچنے میں کسی دشواری کا سامنا نہ کرنا پڑے۔ انہوں نے کہا کہ امتحان انٹرمیڈیٹ (سیکنڈ) سالانہ 2023 کا آغاز انشااللہ20 اکتوبر2023 سے ہو گا جس کیلئے سنگل فیس کے ساتھ داخلہ فارم 14 ستمبر سے25 ستمبر،دوگنا فیس کے ساتھ 26 ستمبر سے29 ستمبراور تین گنا فیس کیساتھ30 ستمبر سے3اکتوبر2023تک ایجوکیشن بورڈ فیصل آباد میں جمع کروائے جا سکیں گے۔

اس موقع پر کمشنر و چیئرپرسن بورڈ سلوت سعید نے کہا کہ طلبا وطالبات کو ری چیکنگ کی سہولت بھی میسر ہے لہٰذاایسے بچے جنہیں اپنے حاصل کردہ نمبروں سے متعلق بے یقینی ہوتو وہ رزلٹ آنے کے بعد 15 دن کے اندر ری چیکنگ کیلئے درخواست دے کر اپنی جوابی کاپی خود چیک کرکے تسلی کر سکتے ہیں۔اس موقع پر چیئرپرسن بورڈنے شاندار،بروقت اور غلطیوں سے پاک رزلٹ تیار کرنے پر سیکرٹری بورڈ ڈاکٹر حبیب الرحمن،کنٹرولر امتحانات ڈاکٹر محمد جعفر علی اور سسٹم اینالسٹ محمد طارق سمیت دیگر تمام متعلقہ افسران و ملازمین کو مبارکباد پیش کرتے ہوئے انہیں شاندار الفاظ میں خراج تحسین پیش کیا۔

انہوں نے کہا کہ بلاشبہ رزلٹ کا بروقت تیار ہونابورڈ افسران و ملازمین کی محنت اور شاندار کارکردگی کا منہ بولتا ثبوت ہے۔ اس موقع پر سیکرٹری بورڈ ڈاکٹرحبیب الرحمن نے کہا کہ طلباوطالبات کو ان کا حق پہنچانا بورڈ ملازمین کے فرائض میں شامل ہے اس لئے نتائج تیار کرتے ہوئے حکومت پنجاب محکمہ ہایئر ایجوکیشن لاہور و چیئرپرسن پی بی سی سی کے وضع کردہ ایس او پیز پر سختی سے عملدرآمد کیا گیا تاکہ کسی بھی بچے کے ساتھ کوئی زیادتی نہ ہو اور اسے اس کی محنت کابھرپور ثمر ملے۔