نگران وزرائ اعلیٰ سندھ و پنجاب کی ملاقات،دونوں صوبوں کے کچے کے علاقوں میں ڈاکوؤں کے خلاف آپریشن سمیت دیگر امور پر تبادلہ خیال

ہفتہ 30 ستمبر 2023 21:20

کراچی (اُردو پوائنٹ اخبارتازہ ترین - اے پی پی۔ 30 ستمبر2023ء) نگران وزیراعلیٰ سندھ جسٹس (ر) مقبول باقر اور نگران وزیراعلیٰ پنجاب محسن نقوی نے آج وزیراعلیٰ ہائوس میں ملاقات کے دوران دونوں صوبوں کے کچے کے علاقوں میں ڈاکوؤں کے خلاف آپریشن سمیت اہم امور پر تبادلہ خیال کیا۔وزیر اعلیٰ ہاوَس سندھ سے جاری اعلامیہ کے مطابق ملاقات بروز ہفتہ وزیراعلیٰ ہاؤس کی انیکسی میں منعقد ہوئی ۔

دونوں نگران وزرائے اعلیٰ نے صوبوں کے کچے کے ڈاکوؤں کے خلاف کلین اپ آپریشن پر تبادلہ خیال کیا۔نگران وزیراعلیٰ سندھ نے کہا کہ ان کی حکومت سکھر اور لاڑکانہ ڈویژن کے کچے کے علاقے میں آپریشن کا باقاعدہ آغاز کر چکی ہے۔ رینجرز،پاک فوج کی شمولیت سے اس میں مزید تقویت آئے گی۔نگران وزیراعلیٰ پنجاب نے کہا کہ پنجاب کے کچے کے علاقے کو بھی اسی طرح کے ڈاکوؤں کا سامنا ہے ۔

(جاری ہے)

پنجاب پولیس ڈاکوؤں کے خلاف متعدد کارروائیاں کرچکی ہے لیکن اب وقت آگیا ہے کہ ان کے خاتمے کے لیے مشترکہ آپریشن شروع کیا جائے۔نگراں وزیراعلیٰ سندھ نے کہا کہ جب سندھ پولیس ان کا پیچھا کرتی ہے تو ڈاکو پنجاب کے کچے کے علاقے کی طرف بھاگتے ہیں ۔انہوں نے مزید کہا کہ ان کے خاتمے کے لیے دونوں صوبوں کو بیک وقت اور مشترکہ آپریشن شروع کرنے کی ضرورت ہے۔

سندھ اور پنجاب دونوں کے وزرائے اعلیٰ نے بیک وقت ڈاکوؤں کے خلاف آپریشن شروع کرنے پر اتفاق کیا تاکہ دونوں صوبوں کی طرف جانے والے ان خارجی راستوں کو بند کیا جا سکے۔دونوں وزرائے اعلیٰ نے انٹیلی جنس رپورٹ ایک دوسرے سے شیئر کرنے پر بھی اتفاق کیا۔ مشترکہ کلین اپ آپریشن کے لیے سندھ اور پنجاب کے آئی جی پیز کے اجلاس بھی منعقد کیے جائیں گے۔

سندھ اور پنجاب کے وزرائے اعلیٰ نے گندم کی فصل24-2023 کی نئی امدادی قیمت پر تبادلہ خیال کیا۔پاکستان میں گندم کی فصل اکتوبر سے دسمبر کے شروع تک بوئی جاتی ہے، اس لیے اکتوبر میں امدادی قیمت کا اعلان کیا جاتا ہے تاکہ کاشتکار بارش کے موسم میں زیادہ گندم اگا سکیں۔سندھ اور پنجاب کے وزرائے اعلیٰ جسٹس باقر اور محسن نقوی نے اس معاملے پر اپنی اپنی کابینہ سے مشاورت کرنے پر اتفاق کیا اور پھر مشترکہ مشاورت سے گندم کی فصل کی امدادی قیمت کا فیصلہ کیا جائے گا۔