ایک درجن کے قریب دہشت گردوں کا میانوالی چیک پوسٹ پر حملہ

ایک اہلکار شہید‘ 2 دہشتگرد مارے گئے‘ پٹرولنگ پوسٹ پر دو اطراف سے حملہ کیا گیا

ساجد علی اتوار 1 اکتوبر 2023 10:53

ایک درجن کے قریب دہشت گردوں کا میانوالی چیک پوسٹ پر حملہ

میانوالی ( اُردو پوائنٹ اخبارتازہ ترین ۔ 01 اکتوبر 2023ء ) ایک درجن کے قریب دہشت گردوں نے میانوالی میں چیک پوسٹ پر حملہ کردیا جس کے نتیجے میں ایک اہلکار شہید اور 2 دہشت گرد مارے گئے۔ میڈیا رپورٹس کے مطابق دس سے بارہ دہشت گردوں نے کنڈل کے مقام پر پٹرولنگ پوسٹ پر حملہ کیا، اس حملے میں ایک اہلکار شہید ہوگیا جب کہ چیک پوسٹ کی چھت پر تعینات اہلکار کی جوابی فائرنگ سے دو دہشت گرد ہلاک ہوگئے۔

آئی جی پولیس عثمان انور نے بتایا کہ پٹرولنگ پوسٹ پر دو اطراف سے حملہ کیا گیا، پنجاب پولیس نے بھرپور جوابی کارروائی کرتے ہوئے کنڈل پٹرولنگ پوسٹ پر دہشت گردوں کا حملہ ناکام بنایا، پولیس کی جوابی کارروائی میں 2 دہشت گرد ہلاک ہوئے جب کہ دیگر فرار ہوگئے۔ انہوں نے کہا کہ اس حملے میں پولیس ہیڈکانسٹیبل ہارون خان دہشت گردوں کے خلاف بہادری سے لڑتے ہوئے شہید ہوئے، ایس ایم ڈی لائٹس کے ساتھ سی ٹی ڈی کی ٹیمیں موقع پر پہنچ گئی ہیں، جنہوں نے دہشت گردوں کا پیچھا کیا، تاہم اندھیرے اور پہاڑی علاقہ ہونے کی وجہ سے انتہائی احتیاط کے ساتھ آپریشن کرنا پڑا۔

(جاری ہے)

خیال رہے کہ چند روز میں دہشتگردی کے کئی واقعات رونما ہوئے، جن میں جشن عید میلاد النبی ﷺ کے موقع پر مستونگ میں مسجد کے باہر جلوس میلاد النبی ﷺ سے قبل خودکش حملے اور ہنگو میں نماز جمعہ کے موقع پر مسجد میں خودکش حملے میں پولیس افسر سمیت درجنوں شہری شہید ہوئے۔ بتایا جاتا ہے کہ نگران وفاقی حکومت نے ملک میں بڑھتے ہوئے دہشت گردی کے حالیہ واقعات کے بعد بڑے ایکشن کا فیصلہ کرتے ہوئے نگران وزیراعظم انوار الحق کاکڑ نے 3 اکتوبر کو نیشنل ایکشن پلان کی ایپکس کمیٹی کااجلاس طلب کر لیا ہے، نگران وفاقی وزیر داخلہ سرفراز بگٹی اجلاس کے شرکاء کو ملکی سکیورٹی پر بریفنگ دیں گے دہشت گردوں کا خاتمہ کرنے کے ساتھ ملک میں مقیم غیر ملکیوں کیخلاف بڑے کریک ڈاؤن کا فیصلہ بھی کیا جائے گا اور نیشنل ایکشن پلان پر غور کے ساتھ اہم نکات پر عملدرآمد کا جائزہ لیا جائے گا۔

معلوم ہوا ہے کہ وزیراعظم ہاؤس میں ہونے والے ایپکس کمیٹی کے اجلاس میں عسکری حکام نگراں کابینہ کے اراکین اور دیگر متعلقہ حکام شرکت کریں گے، اس کے علاوہ چاروں نگراں صوبائی وزرائے اعلیٰ کو بھی اجلاس میں مدعوکیا گیا ہے، ایپکس کمیٹی کے اجلاس میں وزیراعظم آزاد کشمیر، وزیراعلیٰ گلگت بلتستان اور چاروں آئی جی پولیس بھی شریک ہوں گے۔