پاکستان کوئی بیرونی دباو قبول نہیں کرے گا، ڈرون حملے ہماری لوکیشنز کو جانچنے کیلئے تھے، خواجہ آصف

ڈرون حملوں کو انٹرسیپٹ اس لئے نہیں کیا گیا تاکہ ہماری لوکیشنز ٹریس نہ ہوں، قوم مطمئن رہے ہم جواب دینے کیلئے 200 فیصد تیار ہیں، آئندہ چند روز بتائیں گے کہ ہماری بہادر افواج کس طرح ملک کا دفاع کرسکتی ہیں، وزیر دفاع کا قومی اسمبلی میں اظہار خیال

فیصل علوی جمعہ 9 مئی 2025 14:45

پاکستان کوئی بیرونی دباو قبول نہیں کرے گا، ڈرون حملے ہماری لوکیشنز ..

اسلام آباد(اردوپوائنٹ اخبار تازہ ترین۔09 مئی 2025)وزیر دفاع خواجہ آصف کا کہنا ہے کہ پاکستان کوئی بیرونی دباو قبول نہیں کرے گا، ڈرون حملے ہماری لوکیشنز کو جانچنے کیلئے تھے، قوم مطمئن رہے، ہم جواب دینے کیلئے 200 فیصد تیار ہیں، آئندہ چند روز بتائیں گے کہ ہماری بہادر افواج کس طرح ملک کا دفاع کرسکتی ہیں،قومی اسمبلی میں اظہار خیال کرتے ہوئے وزیر دفاع نے کہا کہ کل سے شروع کئے گئے ڈرون حملے ہماری اہم لوکیشنز لینے کیلئے کئے گئے تھے۔

ڈرون حملوں کو انٹرسیپٹ اس لئے نہیں کیا گیا تاکہ ہماری لوکیشنز ٹریس نہ ہوں جب ڈرونز مناسب فاصلے پر آئے تو انہیں مار گرایا گیا۔ پاکستان اپنی جوابی کارروائی میں بھارت کے سویلینز کو نشانہ نہیں بنائے گا۔ ہم صرف فوجی تنصیبات پر حملے کریں گے۔

(جاری ہے)

دنیا کا کوئی ملک ایسا نہیں ہے جس کے ساتھ ہمارے رابطے نہیں ہیں۔ ایران، سعودیہ، قطر اور چین کے ساتھ روزانہ کی بنیاد پر رابطے میں ہیں۔

ایک دو ملکوں نے ہلکی پھلکی بھارت کی حمایت کی ہے باقی سارے یا ہمارے ساتھ کھڑے ہیں یا پھر نیوٹرل ہیں۔انہوں نے کہا کہ بھارتی میڈیا میں جھوٹ کا سیلاب آیا ہوا ہے۔ بھارت نے جس طرح ذلت اٹھائی۔ انہوں نے اپنے عوام کو مطمئن کرنا ہے۔ بھارت اپنے عوام کو یہ تو نہیں بتائے گا کہ سب جگہ ہمیں مار پڑ رہی ہے۔بھارتی میڈیا اس وقت جھوٹ سے بھرا ہوا ہے جس طرح جارحیت کے بعد بھارت کو ذلت کا عالمی سطح پر سامنا ہے۔

اب وہ اپنے عوام کو مطمئن کرنے کی کوشش کررہے ہیں اور یہ سچائی بتانے سے گریز کررہے ہیں کہ ہمیں ہر جگہ پر مار ہی پڑ رہی ہے۔پاک فوج لائن آف کنٹرول (ایل او سی) اور سرحد پر دشمن کا بھرپور مقابلہ کر رہی ہے۔اب بھی جوابی کارروائی رات دن جاری ہے، اس وقت ہماری افواج بہترین پوزیشن میں ہیں، پاکستانی افواج بہادری سے ملک کا دفاع کر رہی ہیں۔وزیر دفاع خواجہ آصف کا مزید کہنا تھا کہ دوست ملک کھل کرپاکستان کے ساتھ کھڑے ہیں۔

ترکیہ اور آذربائیجان نے کھل کر پاکستان کی حمایت کی ہے۔ بھارت کے قریب ترین حلیف بھی اس کاساتھ نہیں دے رہے ہیں۔پاکستانی افواج بہادری سے ملک کا دفاع کررہی ہیں۔ پاکستانی قوم کو اطمینان ہونا چاہئے کہ انڈیا کے عزائم کو ملیا میٹ کیا جاچکا ہے۔ انڈیا کے عوام اور سیاست کے حوصلے پست ہوئے ہیں۔ پوری قوم افواج کے پیچھے کھڑی ہے۔مسلح افواج کی بھرپور جوابی کارروائی اس وقت بھی جاری ہے، ہم اس قت دنیا کے تمام ضروری ممالک کے ساتھ رابطے میں ہیں۔ خلیجی ممالک کے ساتھ روزانہ کی بنیاد پر رابطے میں ہیں۔ نائب وزیراعظم کا سعودی عرب، متحدہ عرب امارات اور چین کے ساتھ روزانہ کی بنیاد پر رابطہ ہے۔مدارس اور اس کے طلبہ ہماری ثانوی دفاعی لائن ہیں۔