صدر سے مسجد الحرام کے خطیب کی ملاقات ،فلسطین کی صورتحال پر گفتگو

پاکستان مسئلہ فلسطین کے منصفانہ اور پرامن دو ریاستی حل کی بھرپور حمایت کرتا ہے، عالمی برادری فلسطینی عوام کی تکالیف کا احساس کرتے ہوئے غزہ میں اسرائیلی مظالم روکنے کیلئے اپنا کردار ادا کرے، عارف علوی

جمعرات 23 نومبر 2023 21:00

اسلام آباد (اُردو پوائنٹ اخبارتازہ ترین - این این آئی۔ 23 نومبر2023ء) صدر مملکت ڈاکٹر عارف علوی نے اس بات کا اعادہ کیا ہے کہ پاکستان مسئلہ فلسطین کے منصفانہ اور پرامن دو ریاستی حل کی بھرپور حمایت کرتا ہے، عالمی برادری فلسطینی عوام کی تکالیف کا احساس کرتے ہوئے غزہ میں اسرائیلی مظالم روکنے کیلئے اپنا کردار ادا کرے۔ صدر مملکت نے ان خیالات کا اظہار مسجد الحرام کے امام خطیب ڈاکٹر صالح بن عبداللہ حمید سے گفتگو کرتے ہوئے کیا جنہوں نے جمعرات کو یہاں ایوان صدر میں ان سے ملاقات کی۔

پاکستان میں سعودی عرب کے سفیر نواف بن سعید احمد المالکی بھی ملاقات میں شریک تھے۔ ایوان صدر کے پریس ونگ کے مطابق ملاقات میں غزہ کی صورتحال، اسلامو فوبیا اور عالم اسلام کو درپیش دیگر چیلنجز پر تبادلہ خیال کیا گیا۔

(جاری ہے)

صدر مملکت نے امام خطیب کا خیرمقدم کرتے ہوئے کہا کہ پاکستان اور سعودی عرب کے درمیان بہترین برادرانہ تعلقات ہیں جو مشترکہ عقیدے، تاریخ اور عوامی روابط پر مبنی ہیں۔

اس موقع پر ڈاکٹر صالح بن عبداللہ حمید نے کہا کہ مسلم دنیا نے مسئلہ فلسطین پر متفقہ موقف اپنایا ہے کہ دو ریاستی حل کی بنیاد پر فلسطینیوں کو ان کے جائز حقوق دیئے جائیں۔ انہوں نے کہا کہ فلسطین میں جاری تشدد اور مظالم کے خاتمے کے لیے مسلم دنیا کی مشترکہ کوششوں اور انسانی ہمدردی اور سفارتی مدد کی ضرورت ہے۔ صدر مملکت نے اہم مسائل پر سعودی عرب کے کردار کو سراہا۔

انہوں نے مسلم اقوام کو درپیش مشترکہ چیلنجوں سے نمٹنے کے لیے ان کے درمیان اتحاد اور یکجہتی کی ضرورت پر زور دیا۔ صدر مملکت نے سعودی عرب ایران تعلقات کی بحالی کے لیے سعودی عرب کی قیادت کی تعریف کی اور اسے ایک اہم پیش رفت قرار دیا اور کہا کہ اس سے تجارت اور ترقی کو فروغ دینے کے علاوہ خطے میں امن و سلامتی کو فروغ ملے گا۔ انہوں نے یمن، شام اور سوڈان میں امن و استحکام کے لیے سعودی اقدامات کو بھی سراہا۔

صدر مملکت نے مشکل وقت میں پاکستان کی معاشی مدد کے ساتھ ساتھ انسانی امداد اور خاص طور پر پاکستان میں تعلیم اور صحت کے شعبوں میں ترقیاتی منصوبوں میں تعاون پر سعودی عرب کا شکریہ ادا کیا۔ صدر عارف علوی نے خاص طور پر بھارت میں اسلامو فوبیا اور مقبوضہ جموں و کشمیر کے عوام پر بھارتی مظالم کو بھی اجاگر کیا۔ انہوں نے کہا کہ بھارت مقبوضہ جموں و کشمیر کا آبادیاتی تناسب بدل رہا ہے اور مسلمانوں کی نسلی کشی میں ملوث ہے۔ اس موقع پر ڈاکٹر صالح بن عبداللہ حمید نے حکومت ِپاکستان کی طرف سے پرتپاک استقبال اور مہمان نوازی پر شکریہ ادا کیا۔