ن لیگ کی انتخابی مہم نواز شریف کے مقدموں سے مشروط ہے

نواز شریف کو بحال کر کے چھینی گئی لیول پلیئنگ فیلڈ ہمیں واپس کی جائے, احسن اقبال

دانش احمد انصاری منگل 28 نومبر 2023 23:43

لاہور (اُردو پوائنٹ اخبارتازہ ترین۔ 28 نومبر2023ء) مسلم لیگ ن کے سینئر رہنما احسن اقبال نے کہا ہے کہ ن لیگ کی انتخابی مہم نواز شریف کے مقدموں سے مشروط ہے۔ انہوں نے نجی ٹی وی چینل جیو نیوز کے پروگرام میں گفتگو کرتے ہوئے کہا کہ نواز شریف کو بحال کر کے چھینی گئی لیول پلیئنگ فیلڈ ہمیں واپس کی جائے۔ ن لیگی سیکریٹری جنرل نے مزید کہا کہ جن کرداروں نے نواز شریف کے خلاف سازش کی وہ اب ملک سے رخصت ہوگئے۔

ان کا کہنا تھا کہ عدالتوں پر کسی کا سایہ نہیں، امید ہے نواز شریف پر بنے جھوٹے مقدمے ختم ہوجائیں گے۔ احسن اقبال نے یہ بھی کہا کہ نواز شریف کو اپنا بنیادی حق ملنے کے بعد مسلم لیگ ن کی طرف سے وہ وزیراعظم ہوں گے۔ انہوں نے کہا کہ مسلم لیگ ن نے کسی پر جملوں سے حملہ نہیں کیا، پیپلز پارٹی کی طرف سے بلاول بھٹو البتہ بیانات دیتے نظر آ رہے ہیں۔

(جاری ہے)

ن لیگی رہنما نے کہا کہ نواز شریف کو سیاست سے باہر کرکے 2017ء میں لیول پلیئنگ فیلڈ چھینی گئی، لیول پلیئنگ فیلڈ نہ ملنے کی سب سے بڑی شکار ن لیگ رہی ہے۔ احسن اقبال نے کہا کہ پارٹی قائد نواز شریف کے مقدموں کا فیصلہ ہوجائے تو بھرپور قومی مہم کو لیڈ کریں گے۔ انہوں نے کہا کہ نواز شریف کے خلاف مقدمے کے جھوٹے ہونے کی گواہی دشمن بھی دے چکے، ن لیگی قائد کے خلاف بنائے گئے مقدمات سازش کا حصہ تھے۔

واضح رہے کہ گزشتہ روز پاکستان پیپلز پارٹی کے رہنما مولا بخش چانڈیو نے کہا تھا کہ ن لیگ کے رویے سے لگتا ہے وہ الیکشن نہیں چاہتے، ن لیگ تاثر دے رہی ہے کہ الیکشن وہ جیتیں گے مگر یہ لوگ کوئی انتخابی مہم نہیں چلارہے۔