نگران وزیر اعلی پنجاب کا گلبرگ میں سکھ یاتریوں کی فیملی سے ڈکیتی کے واقعہ کا سخت نوٹس، رپورٹ طلب کرلی

بدھ 29 نومبر 2023 21:10

لاہور (اُردو پوائنٹ اخبارتازہ ترین - اے پی پی۔ 29 نومبر2023ء) نگران وزیر اعلی پنجاب محسن نقوی نے گلبرگ میں سکھ یاتریوں کی فیملی سے ڈکیتی کے واقعہ کا سخت نوٹس لیتے ہوئے سی سی پی او لاہور سے رپورٹ طلب کرلی ہے۔

(جاری ہے)

وزیراعلی محسن نقوی نے ڈکیتی میں ملوث ملزمان کی جلد گرفتاری کا حکم دیتے ہوئے کہاکہ سی سی ٹی وی کیمروں کی مدد سے ملزمان کی فوری شناخت کی جائے اور 48 گھنٹے میں ملزمان کو قانون کی گرفت میں لایا جائے۔

انہوں نے کہاکہ گلبرگ جیسے علاقے میں سکھ فیملی سے ڈکیتی کا واقعہ سنگین غفلت ہے۔ غفلت کا تعین کیا جائے اورذمہ دار پولیس کے خلاف بھی کارروائی عمل میں لائی جائے۔انہوں نے کہاکہ سکھ یاتری ہمارے مہمان ہیں اور ان کا تحفظ ہماری ذمہ داری ہے۔انہوں نے کہا کہ متاثرہ سکھ فیملی سے پوری ہمدردی ہے، ملزمان قانون کی گرفت سے نہیں بچ پائیں گے۔