بحرین کے رکن پارلیمنٹ کا امریکی و برطانوی سفیروں کے ساتھ بیٹھنے سے انکار

جمعرات 30 نومبر 2023 17:20

نیویارک(اُردو پوائنٹ اخبارتازہ ترین - این این آئی۔ 30 نومبر2023ء) بحرین کے رکن پارلیمنٹ محمد البلوشی نے اقوام متحدہ کی تقریب میں امریکی، فرانسیسی اور برطانوی سفیروں کے ساتھ بیٹھنے سے انکار کر دیا۔غیر ملکی میڈیا رپورٹس کے مطابق نیویارک میں اقوام متحدہ کے ہیڈ کوارٹر میں فلسطینی عوام کے ساتھ یکجہتی کے عالمی دن کے موقع پر ایک تقریب منعقد کی گئی، یہ تقریب ہر سال جنیوا، ویانا اور نیروبی میں بھی اقوام متحدہ کے دفاتر میں منعقد ہوتی ہے۔

تقریب میں بحرینی ایم پی محمد موسی البلوشی نے ایک دلیرانہ تقریر کرتے ہوئے غزہ کی پٹی کے خلاف جارحیت کے سلسلے میں اسرائیلی مقف کی حمایت پر امریکا، برطانیہ اور فرانس پر شدید تنقید کی۔محمد البلوشی نے کہا فلسطینی کاز صرف عرب یا مسلمانوں کا نہیں ہے یہ کاز دنیا بھر میں موجود ہر آزاد انسان کا ہے، ہم دیکھ رہے ہیں کہ فلسطین میں کتنا ظلم ہو رہا ہے، غزہ میں اسرائیلی فورسز ہمارے بہن بھائیوں کو شہید کر رہی ہیں، یہ تاریخ کے بدترین جنگی جرائم ہیں۔

(جاری ہے)

انھوں نے کہا میں حیران ہوں کہ آج فلسطین سے یکجہتی کے دن پر امریکی، فرانسیسی اور برطانوی سفیر یہاں موجود ہیں، یہ وہ ملک ہیں جو اسرائیل کی حمایت کرتے ہیں، بدقسمتی سے آج یہ لوگ یہاں فلسطینیوں سے اظہار یکجہتی کا دعوی کر رہے ہیں، یہ ایسا ہے کہ پہلے قتل کرو اور پھر جنازے پر ماتم کرنے آجا، اس دوغلے پن پر ایونٹ کا حصہ نہیں بنوں گا، تقریب میں امریکی، فرانسیسی اور برطانوی سفیر کی موجودگی پر مجھے اعتراض ہے۔