سموگ کی صورتحال،پابندیاں ختم کی جارہی ہیں، ادارے مارکیٹیں ، ریسٹورنٹس معمول کے مطابق کھلیں گے‘ محسن نقوی

جمعہ 1 دسمبر 2023 18:27

لاہور (اُردو پوائنٹ اخبارتازہ ترین - این این آئی۔ 01 دسمبر2023ء) وزیر اعلیٰ پنجاب محسن نقوی کی زیر صدارت وزیر اعلیٰ آفس میں کابینہ کمیٹی برائے انسداد سموگ کا اجلاس منعقد ہوا جس میں سموگ کی موجودہ صورتحال کا جائزہ لیا گیا۔ ماہرین ماحولیات اور صحت نے سموگ میں کمی اور سموگ کے مضر اثرات سے بچانے کے لئے تجاویز پیش کیں۔ اجلا س میں ماہرین ماحولیات اور صحت کی سفارشات کی روشنی میں بعض اہم فیصلے کیے گئے۔

وزیر اعلیٰ محسن نقوی نے ان فیصلوں کا اعلان کرتے ہوئے کہا کہ سموگ کے حوالے سے پابندیوں کو ختم کیا جا رہاہے۔ادارے، مارکیٹیں ، بازار،ریسٹورنٹس اور بزنس ہائوسز آج بروز ہفتہ اور کل بروز اتوار معمول کے مطابق کھلے رہیں گے جبکہ 18دسمبر سے پنجاب کے تعلیمی اداروں میں میں موسم سرما کی تعطیلات ہوں گی۔

(جاری ہے)

وزیراعلیٰ محسن نقوی نے انتظامیہ ، لاہور ویسٹ مینجمنٹ کمپنی ، پی ایچ اے کو ہدایت کی کہ سڑکوں کی صفائی اور پانی کے چھڑکائو کا عمل بدستور جاری رکھا جائے ۔

وزیر اعلیٰ محسن نقوی نے دھواں چھوڑنے والی گاڑیوں کے خلاف موثر کریک ڈائون کا حکم د یتے ہوئے کہا کہ ٹائر جلانے والی فیکٹریوں کے خلاف بھی بلاامتیاز کارروائی جاری رکھی جائے۔محسن نقوی نے کہا کہ سموگ میں کمی کے لئے جو کچھ انسانی بس میں ہے وہ اقدام اٹھارہے ہیں۔ پوری کوشش ہے کہ ایئرکوالٹی انڈیکس کم سے کم رہے۔ صوبائی وزراء ، ایس ایم تنویر، ڈاکٹر جاوید اکرم، منصور قادر،عامر میر، اظفر علی ناصر، ابراہیم حسن مراد ،بلال افضل، چیف سیکرٹری،انسپکٹر جنرل پولیس، چیئرمین پلاننگ اینڈ ڈویلپمنٹ بورڈ، ایڈیشنل چیف سیکرٹری داخلہ، متعلقہ محکموں کے سیکرٹریز اور اعلیٰ حکام نے اجلاس میں شرکت کی۔