اسد قیصر کے مزید جسمانی ریمانڈ کی استدعا مسترد

عدالت نے پی ٹی آئی رہنماء کو 14 روزہ جوڈیشل ریمانڈ پر جیل بھیج دیا

ساجد علی اتوار 3 دسمبر 2023 11:43

اسد قیصر کے مزید جسمانی ریمانڈ کی استدعا مسترد

مردان ( اُردو پوائنٹ اخبارتازہ ترین ۔ 03 دسمبر 2023ء ) پاکستان تحریک انصاف کے رہنماء سابق سپیکر قومی اسمبلی اسد قیصر کے مزید جسمانی ریمانڈ کی استدعا مسترد کرتے ہوئے عدالت نے 14 روزہ جوڈیشل ریمانڈ پر جیل بھیج دیا۔ تفصیلات کے مطابق عدالت نے 9 مئی کے توڑ پھوڑ کیس میں سابق سپیکر اور تحریک انصاف کے رہنما اسد قیصر کا مردان پولیس کو جسمانی ریمانڈ دینے سے انکار کرتے ہوئے انہیں جوڈیشل ریمانڈ پرجیل بھیج دیا۔

بتایا گیا ہے کہ مردان پولیس نے گزشتہ روز ضمانت ہونے پر ایک اورکیس میں سابق سپیکر اسد قیصر کو گرفتار کیا تھا اور آج جوڈیشل مجسٹریٹ عطا الرحمان کی عدالت میں پیش کیاگیا جہاں پولیس کاکہنا تھا کہ 9مئی کے توڑ پھوڑ کے واقعات میں اسد قیصرکیخلاف مقدمہ درج ہے، جس کی تفتیش کے لیے جسمانی ریمانڈ دیا جائے۔

(جاری ہے)

خیال رہے کہ سابق اسپیکر قومی اسمبلی اسد قیصر کو عدالت سے ضمانت منظور ہونے کے باوجود دوبارہ گرفتار کیا گیا ہے، اسد قیصر کو ڈسٹرکٹ جیل سے رہائی کے بعد فوری دوبارہ گرفتار کر لیا گیا، پولیس نے اسد قیصر کو ڈسٹرکٹ جیل مردان کے احاطے سے گرفتار کیا، جس کے بعد پولیس اسد قیصر کو تھانہ سٹی لے گئی۔

قبل ازیں مردان کی عدالت نے پی ٹی آئی رہنما اسد قیصر کی درخواستِ ضمانت منظورکرکے رہائی کا حکم جاری کیا تھا، سیشن جج مردان محمد زیب نے اسد قیصر کی نو مئی کے مقدمے میں ضمانت منظور کی، عدالت نے حکم دیا تھا کہ اگر اسد قیصر کسی اور مقدمہ میں ملوث نہیں تو انہیں ضمانت پر رہا کر دیا جائے۔ مزید برآں پشاورہائیکورٹ نے سابق سپیکر اسد قیصر کی باربار گرفتاری پر حکومت سے جواب طلب کرتے ہوئے ریمارکس دیئے کہ یہ کیا مذاق ہے، ضمانت ملنے کے بعد دوسرے مقدمے میں گرفتار کرتے ہیں، قانون اس پر کیا کہتا ہے یہ دیکھیں گے۔

پشاور ہائی کورٹ میں جسٹس اشتیاق ابراہیم اور جسٹس صاحبزادہ اسد ال نے پی ٹی آئی رہنماء و سابق سپیکر قومی اسمبلی اسد قیصرکیخلاف موجودہ مقدمات میں گرفتار نہ کرنے کی درخواست پر سماعت کی، درخواست گزار اسد قیصر کے وکیل نے عدالت میں موقف اختیار کیا کہ ’ضمانت ملتے ہی دوسرے مقدمے میں گرفتارکر لیا جاتا ہے، پہلے سے درج مقدمات میں گرفتار نہ کیا جائے‘، جس پر سرکاری وکیل نے موقف اپنایا کہ ’اسد قیصر مقدمات میں نامزد ہیں اس لئے گرفتار ہوتے ہیں‘۔