سول اسپتال ٹراما سینٹر کے اطراف ٹریفک جام نے محکمہ فائر بریگیڈ کے لیے مشکلات پیدا کردیں

کسی بھی ہنگامی صورت حال میں نکلنے والی فائر بریگیڈ کی گاڑیاں اس ٹریفک جام کی وجہ سے بروقت جائے حادثہ پر پہنچنے میں ناکام رہتی ہیں

بدھ 6 دسمبر 2023 23:18

کراچی (اُردو پوائنٹ اخبارتازہ ترین - این این آئی۔ 06 دسمبر2023ء) سول اسپتال کراچی کے ٹراما سینٹر کے اطراف مستقل طور پر رہنے والے ٹریفک جام نے شہریوں کے ساتھ محکمہ فائر بریگیڈ کے لیے بھی مشکلات پیدا کردی ہیں ،کسی بھی ہنگامی صورت حال میں نکلنے والی فائر بریگیڈ کی گاڑیاں اس ٹریفک جام کی وجہ سے بروقت جائے حادثہ پر پہنچنے میں ناکام رہتی ہیں،ڈپٹی چیف فائر آفیسر نے ڈپٹی کمشنر جنوبی کو مراسلہ ارسال کرکے شکایت کا ازالہ کرنے کی اپیل کی ہے ۔

تفصیلات کے مطابق فائربریگیڈ ڈپارٹمنٹ کے ایم سی کے ڈپٹی چیف فائر آفیسر نے ڈپٹی کمشنر جنوبی کے نام ایک خط میں کہا ہے کہ مین ٹراما سینٹر سوال کے اطراف ٹریفک جام ہونے کی وجہ سے ان کے محکمے کے لیے کام کرنے میں مشکلات درپیش ہیں ۔

(جاری ہے)

ان کا کہنا تھا کہ ایمرجنسی کی صورت حال میں یہاں سے فائربریگیڈ کی گاڑیاں نکالنے میں بہت پریشانی ہوتی ہے اور فائر بریگیڈ کی گاڑیوں کو آگ لگنے والے مقامات پر پہنچنے میں تاخیر ہوجاتی ہے ۔

ادھر علاقہ مکینوں نے کہا کہ فائر اسٹیشن کے اطراف غیرقانونی پارکنگ رکشہ اسٹینڈ اور ہوٹل ہیں جن کی وجہ سے ٹریفک جام ہوتا ہے۔ فائر بریگیڈ اور ایمبولینس بھی اس ٹریفک جام میں پھنس جاتی ہیں جبکہ علاقہ مکین بھی اس کی وجہ سے شدید پریشانی میں مبتلا ہیں ۔انہوںنے نگراں وزیراعلیٰ سندھ جسٹس (ر)مقبول باقر سے اپیل کی کہ وہ ایس آئی یو ٹی کے سربراہ پروفیسر ڈاکٹر ادیب رضوی ،میئر کراچی بیرسٹر مرتضیٰ وہاب ،ٹراماسینٹر کے ایگزیکٹو ڈائریکٹر ڈاکٹر صابر میمن ،ڈی آئی ٹریفک کراچی ،ڈپٹی کمشنر جنوبی اور دیگر متعلقہ حکام کے ہمراہ علاقے کا دورہ کریں اور مذکورہ صورت حال کا ازخود جائزہ لے کر مسائل کے تدارک کے لیے احکامات جاری کریں ۔