فلسطین کو پوری دنیا میں نمایاں کردیا ،علماء کرام منبر ومحراب کے ذریعے مسئلہ فلسطین کو اجاگر اور صہیونی فوج کی درندگی سے عوام الناس کو آگاہ کریں،محمد حسین محنتی

جمعرات 7 دسمبر 2023 23:14

کراچی(اُردو پوائنٹ اخبارتازہ ترین - آن لائن۔ 07 دسمبر2023ء) جماعت اسلامی سندھ کے امیروسابق رکن قومی اسمبلی محمد حسین محنتی نے کہا ہے کہ فلسطین کا دوریاستی حل ناقابل قبول ہے،اسرائیل قابض ریاست اور ایک آزاد فلسطینی ریاست ہی مشرق وسطیٰ میں امن کی ضمانت ہے، استعماری طاقتوں نے یہودیوں کو اکٹھاکرکے سرزمین انبیاء پر قبضہ کیا، حماس نے مزاحمت کرکے جذبہ جہاد کو زندہ اور 76سال سے دبے ہوئے مسئلہ فلسطین کو پوری دنیا میں نمایاں کردیا ہے،حماس وفلسطینی عوام کی قربانیاں اور جدوجہد ایک دن ضرور رنگ لائیں گی اور افغانستان سے جس طرح نیٹو وامریکی افواج بھاگنے پر مجبور ہوئی اسی طرح صہیونی فوج کو بھی غزہ میں عبرتناک شکست ملے گی۔

غزہ میں صہیونی درندگی کو دو ماہ گذرچکے،فاسفورس بم پھینکے جارہے ہیں مگر اس ساری صورتحال پر مسلم حکمرانوں سمیت عالمی ضمیر خاموش تماشائی بنا ہوا ہے۔

(جاری ہے)

علماء کرام منبر ومحراب کے ذریعے مسئلہ فلسطین کو اجاگر اور صہیونی فوج کی درندگی سے عوام الناس کو آگاہ کریں۔ان خیالات کا اظہار انہوں نے قباء آڈیٹوریم میں جمعیت طلبہ عربیہ کے منتظم اعلیٰ مولانا محمد افضل کی قیادت میں ملاقات کرنے والے ایک اعلیٰ سطحی وفد سے بات چیت کے دوران کیا، وفد میں امین عام اعجاز الحق،معاونین اور چاروں صوبوں کے منتظمین سمیت مرکزی شوریٰ کے دیگر ارکان بھی شامل تھے۔

منتظم اعلیٰ محمد افضل نے امیرصوبہ کو جمعیت طلبہ عربیہ پاکستان کی دعوتی تنظیمی اورعلمی سرگرمیوں سے آگاہ کیا۔صوبائی امیر نے مزیدکہاکہ فلسطین کے دوریاستی حل کی باتیں کرنے والے اسرائیلی ایجنٹ اورغزہ کے مظلوم مسلمانوں کے زخموں پرنمک پاشی کر رہے ہیں۔حکمران بھلے سامراجی قوتوں کے ایجنٹ وغلام بنے رہیں مگر پاکستان سمیت دنیا بھرکے مسلمان غزہ کے اپنے مظلوم بھائیوں کے ساتھ کھڑے ہیں۔