اوپن یونیورسٹی کا سالانہ کانووکیشن 31 جنوری کو اسلام آباد میں منعقدہوگا

اسلام آباد(اُردو پوائنٹ اخبارتازہ ترین - آن لائن۔ 08 دسمبر2023ء) علامہ اقبال اوپن یونیورسٹی کا جلسہ تقسیم اسنا د(کانووکیشن )31 جنوری، 2024ئ کو اسلام آباد کے جناح کنونشن سینٹرمیں منعقدہوگا، اس موقع پر یونیورسٹی کے چانسلر/صدر مملکت ڈاکٹر عارف علوی تقریب کے مہمان خصوصی ہوں گے۔یونیورسٹی کے وائس چانسلر، پروفیسر ڈاکٹر ناصر محمود تقریب میں میزبانی کے فرائض انجام دیں گے۔

اس تقریب میں وفاقی وزرا، سیکرٹریز، وزارت تعلیم اور ہائر ایجوکیشن کمیشن کے اعلیٰ عہدیداران، مختلف جامعات کے وائس چانسلرز، ریکٹرز، یونیورسٹی کے چاروں ڈین، پروفیسرز، پرنسپل افسران و فیکلٹی ممبران، طلبائ و طالبات کے علاوہ ملک کے نامور صحافی اور سماجی شخصیات شریک ہوں گے۔یہاں یہ بات قابل ذکر ہے کہ 2024ئ علامہ اقبال اوپن یونیورسٹی کی گولڈن جوبلی کا سال ہے، وائس چانسلر، پروفیسر ڈاکٹر ناصر محمود نے اِس خوشی کو بھرپور انداز سے منانے اور طلبہ کو اِس خوشی میں شامل کرنے کے لئے اِس بڑی تقریب کے انعقاد کا فیصلہ کیا ہے۔

(جاری ہے)

یونیورسٹی نے تمام صوبائی دارالحکومتوں(کراچی، لاہور، کوئٹہ اور پشاور)کے علاوہ مظفر آباد میں بھی وہاں کے مقامی طلبہ کے لئے جلسہ تقسیم اسناد کے انعقاد کی تیاریاں مکمل کرلی ہیں۔اسلام آباد، گلگت بلتستان اور راولپنڈی ڈویڑن(اٹک، چکلالہ، جہلم اور راولپنڈی)کے طلبہ اسلام آباد کے جناح کنوینشن سینٹر میں 31جنوری کے جلسہ تقسیم اسناد میں شرکت کریں گے۔

بی اے، بی ایس سی، بی بی اے، بی کام، بی ایڈ، ایم ایڈ، ایم ای/ایم ایس سی، ایم فل اور پی ایچ ڈی پروگرامز کے فارغ التحصیل تمام طلبہ کو کانووکیشن میں شرکت کی اہلیت دیکھنے کے لئے http://convocation.aiou.edu.pkکا وزٹ کرنے کی ہدایت کی گئی ہے۔ اہلیت پر پورا اترنے والے طلبہ اسی لنک پر 20دسمبرتک اپنے آپ کو رجسٹر کرسکتے ہیں۔واضح رہے کہ کراچی چیپٹر کا کانووکیشن 3مارچ، 2024ئ کو ہوگا، لاہورمیں 28مارچ، کوئٹہ میں 19مئی جبکہ پشاور اور مظفرآباد چیپٹر کے کانووکیشنز باالترتیب 9جون اور 30جون، 2024کو منعقد ہوں گے۔

واضح رہے کہ پی ایچ ڈی پروگرامز کے فارغ التحصیل تمام طلبہ اسلام آباد چیٹر کے کانووکیشن کے لئے رجسٹریشن کریں گے جبکہ ایم فل پروگرامز کے طلبہ کو گولڈ میڈلز اور ڈگریاں اٴْن کے دارالحکومتوں میں منعقدہ کانووکیشنز میں دی جائیں گی۔طلبہ کانووکیشن کے بارے میں مزید تفصیلات [email protected]یا فون نمبر 9571717-051پر حاصل کرسکتے ہیں۔