اے سی سی انڈر19ایشیا کپ ،پاکستان اور انڈیا (آج) مدمقابل ہونگے

ہفتہ 9 دسمبر 2023 20:15

دبئی(اُردو پوائنٹ اخبارتازہ ترین - این این آئی۔ 09 دسمبر2023ء) اے سی سی انڈر 19 ایشیا کپ 2023میں پاکستان اور انڈیا (آج)اتوار کو مدمقابل ہونگے ۔پاکستان انڈر 19 ٹیم نے ٹورنامنٹ کا آغاز نیپال کے خلاف 7 وکٹوں کی پراعتماد جیت سے کیا ہے جس میں 18 سالہ محمد ذیشان کی 19 رنز دے کر چھ وکٹوں اور بعد میں بیٹنگ کرتے ہوئے صرف آٹھ گیندوں پر 20 رنز کی شاندار کارکردگی نے فیصلہ کن کردار ادا کیا ان کے علاوہ سعد بیگ اور اذان اویس کی سنچری پارٹنرشپ نے اپنی ٹیم کی جیت کو ممکن بنادیا۔

محمد ذیشان کی یہ کارکردگی شاہین آفریدی 15رنز دے کر 6وکٹ کے بعد انڈر 19ون ڈے میں کسی بھی پاکستانی بولر کی دوسری بہترین بولنگ ہے۔پاکستان انڈر 19 ٹیم نے آخری مرتبہ انڈیا انڈر 19 کے خلاف قاسم اکرم کی قیادت میں 2021 میں دو وکٹوں سے سنسنی خیز انداز میں کامیابی حاصل کی تھی جس میں محمد شہزاد 81 رنز بنانے پر میچ کے بہترین کھلاڑی بنے تھے۔

(جاری ہے)

پاکستان انڈر 19 ٹیم کے ہیڈ کوچ محمد یوسف نے پی سی بی ڈیجیٹل سے بات کرتے ہوئے کہاکہ تمام کھلاڑیوں نے اچھی کارکردگی کا مظاہرہ کیا، خاص طور پر بولرز نے ذمہ داری سے بولنگ کی۔

کپتان سعد بیگ اور اذان اویس دونوں نے کنڈیشنز کو اچھی طرح سمجھتے ہوئے نصف سنچریاں بنائیں۔ ان دونوں کھلاڑیوں کے درمیان شراکت نے ہمیں آسانی سے ہدف تک پہنچادیا۔انہوں نے کہا کہ ہم نے محمد ذیشان کو پنچ ہٹر کے طور پر بھیجا اور انہوں نے خود کو ثابت کیا۔ ہم نے ہدف 26.2 اوورز میں حاصل کر لیا، جس سے ٹورنامنٹ کے شروع میں ہی ہمارا نیٹ رن ریٹ بڑھ گیا ۔

تمام لڑکے کھیل پر مکمل توجہ رکھنے اور نظم و ضبط والے ہیں۔(آج) کا میچ ہمارے لئے معمول کے کھیل کی طرح ہے، ہم دوسرے تمام کھیلوں کی طرح جیتنے کی کوشش کریں گے اور کارکردگی دکھانے کے لیے پوری طرح تیار ہیں۔محمد یوسف نے کہا کہ ذیشان میں غیرمعمولی ٹیلنٹ ہے، اس کا مضبوط جسم اور قد ہے، جو اس کی بہت مدد کرتا ہے۔ اس نے صحیح لائن اور لینتھ کے ساتھ بائولنگ کی اور خود کو نہ صرف ایک اچھا بائوولر بلکہ ایک قابل بھروسہ بیٹر کے طور پر بھی ثابت کیا۔ اس سے ہماری ٹیم کو فائدہ ہوگا۔