بانی پی ٹی آئی کیخلاف 190ملین پاونڈز ریفرنس کیس میں اہم پیشرفت

پی ٹی آئی کابینہ میں سے صرف 3وفاقی وزراء ہی نیب کے گواہ بنے،گواہان میں پرویز خٹک، ندیم افضل چن اور زبیدہ جلال شامل

ہفتہ 9 دسمبر 2023 21:20

بانی پی ٹی آئی کیخلاف 190ملین پاونڈز ریفرنس کیس میں اہم پیشرفت

اسلا م آباد(اُردو پوائنٹ اخبارتازہ ترین - این این آئی۔ 09 دسمبر2023ء) بانی پاکستان تحریک انصاف کے خلاف 190ملین پاونڈز ریفرنس کیس میں اہم پیشرفت ہوئی ہے۔ بانی پی ٹی آئی کے خلاف ریفرنس میں 59گواہان کو شامل کیا گیا ہے جن کے نام سامنے آگئے۔ذرائع نے بتایاکہ پی ٹی آئی کابینہ میں سے صرف 3 وفاقی وزراء ہی نیب کے گواہ بنے، ریفرنس کے گواہان میں پرویز خٹک، ندیم افضل چن اور زبیدہ جلال شامل ہیں۔

پرویز خٹک، ندیم افضل چن، زبیدہ جلال، اعظم خان کا ایک ایک صفحے پر مشتمل بیان ہے۔

(جاری ہے)

سابق پرنسپل سیکریٹری اعظم خان بھی وعدہ معاف نہیں بنے، بطور گواہ شامل ہوئے ہیں، دیگر گواہان میں قومی احتساب بیورو (نیب)، بینک، سیکیورٹی ایکسچینج کمیشن آف پاکستان (ایس ای سی پی)افسران اور پٹواری بھی شامل ہیں۔ذرائع کے مطابق ایسیٹ ریکوری یونٹ کے سیکریٹری کے نام بھی گواہوں کی فہرست میں شامل کیے گئے ہیں، سپرنٹنڈنٹ وزیراعظم آفس ندیم بٹ بھی گواہ کے طور پر سامنے آگئے، القادر ٹرسٹ کے ایگزیکٹو ڈائریکٹر اور چیف فنانشل افسر بھی نیب کے گواہ بن گئے۔متحدہ قومی موومنٹ (ایم کیو ایم)کا کوئی وفاقی وزیر بانی پی ٹی آئی کے خلاف گواہ نہیں بنا۔