آئندہ انتخابات میں وزیراعظم بلاول بھٹو یا نوازشریف ہوں گے،منظور وسان

فضل الرحمان صدرنہیں بنیں گے، بلے کے بھی عام انتخابات میں ففٹی ففٹی چانسز ہیں،رہنما پیپلزپارٹی

پیر 11 دسمبر 2023 17:43

کراچی (اُردو پوائنٹ اخبارتازہ ترین - این این آئی۔ 11 دسمبر2023ء) پاکستان پیپلز پارٹی کے رہنما منظور وسان نے مزید سیاسی پیش گوئیاں کرتے ہوئے کہا ہے کہ آئندہ انتخابات میں وزیراعظم بلاول بھٹو یا نوازشریف ہوں گے تاہم فضل الرحمان صدرنہیں بنیں گے۔سیاسی پیشگوئیوں کے حوالے سے شہرت رکھنے والے پاکستان پیپلز پارٹی کے رہنما منظور وسان نے اپنے بیان میں کہاکہ میں نے خواب دیکھا ہے الیکشن8 فروری کوہوں گے اور آئندہ انتخابات میں وزیراعظم بلاول بھٹو یا نوازشریف ہوں گے۔

(جاری ہے)

مسلم لیگ ن اور پیپلزپارٹی کے اتحاد سے متعلق منطوروسان نے کہا کہ پیپلزپارٹی اور ن لیگ میں اتحادنہیں بلکہ سخت مقابلہ ہوگا۔فضل الرحمان کے حوالے سے پی پی رہنما نے پیش گوئی کہ فضل الرحمان اچھے آدمی ہیں مگر وہ صدرنہیں بنیں گے، ہوسکتا ہے پہلے کی طرح مولانا کشمیر کمیٹی کے سربراہ بنیں۔انتخابات میں پی ٹی آئی سے متعلق انہوںنے کہاکہ بلے کے بھی عام انتخابات میں ففٹی ففٹی چانسز ہیں۔نئے سال کے حوالے سے منظور وسان نے کہا کہ نیا سال ملک اورسیاست کیلیی2023 سے بہترہوگا اور نیاسال معیشت،امن وامان کیلئے بھی اچھاثابت ہوگا۔انہوںنے کہا کہ سال2024میں اب پرانی غلطیاں نہیں دہرائی جائیں گی۔