شاہ محمود قریشی کا ٹریبونل کے فیصلے کیخلاف ہائیکورٹ جانے کا اعلان

سابق وزیر خارجہ کی جانب سے نااہلی کے معاملے کو لاہور ہائیکورٹ کے لارجر بینچ میں چیلنج کیا جائے گا

ساجد علی اتوار 7 جنوری 2024 16:09

شاہ محمود قریشی کا ٹریبونل کے فیصلے کیخلاف ہائیکورٹ جانے کا اعلان

لاہور ( اُردو پوائنٹ اخبارتازہ ترین ۔ 07 جنوری 2024ء ) پاکستان تحریک انصاف کے وائس چیئرمین شاہ محمود قریشی نے الیکشن ٹریبونل کے فیصلے کے خلاف لاہور ہائیکورٹ جانے کا اعلان کردیا۔ تفصیلات کے مطابق سابق وزیر خارجہ کے وکلاء نے الیکشن ٹریبونل کے فیصلے کو لارجر بنچ میں چیلنج کرنے کی تیاری شروع کر دی اور امکان ظاہر کیا جا رہا ہے کہ شاہ محمود قریشی کے وکلاء کل اپیل دائر کریں گے، شاہ محمود قریشی اپنے آبائی حلقے ملتان سے ہر صورت الیکشن لڑنا چاہتے ہیں، تاہم ایپلٹ ٹریبونل نے پی ٹی آئی کے مرکزی رہنما اور سابق وزیر خارجہ شاہ محمود قریشی کے کاغذات نامزدگی گزشتہ روز مسترد کردیئے تھے جس کے بعد وہ الیکشن لڑنے کیلئے نااہل ہو گئے ہیں۔

بتایا جارہا ہے کہ ملتان کے ایپلٹ ٹریبونل کے جج جسٹس سردار محمد سرفراز ڈوگر نے اپیلوںپر فیصلہ سنایا جس میں انہوں نے پی ٹی آئی کے وائس چیئرمین شاہ محمود قریشی کی آر او کی جانب سے کاغذات نامزدگی مسترد کیے جانے کے خلاف دائر اپیل مسترد کردی تھی، شاہ محمود قریشی کی جانب سے این اے 150 ، 151 اور پی پی 218 ، پی پی 219 میں کاغذات نامزدگی مسترد ہونے کی اپیلیں دائرکی گئی تھیں جنہیں ٹریبونل نے مسترد کردیا۔

(جاری ہے)

ادھر سابق وزیر خارجہ شاہ محمود قریشی نے این اے 214 تھر پارکر سے کاغذات جمع کروائے جو منظور کرلیے گئے، اسی حلقہ سے ان کے صاحبزادے ذین قریشی کے کاغذات نامزدگی بھی منظور ہوچکے ہیں جب کہ پی ٹی آئی سندھ کے صدر حلیم عادل شیخ کے کاغذات نامزدگی منظور کر لیے گئے، حلیم عادل شیخ نے این اے 238 سے کاغذات نامزگی جمع کروائے تھے، پی ٹی آئی کے ارسلان خالد کے کاغذات نامزدگی منظور کر لیے گئے، ارسلان خالد نے این اے 241 سے کاغذات نامزدگی جمع کروائے تھے، علاوہ ازیں الیکشن ٹریبونل نے فردوس شمیم نقوی کی اپیل منظور کرلی، فردوس شمیم نقوی این اے 236 سے ریٹرننگ افسر نے کاغذات نامزدگی مسترد کردیے تھے۔