فیصل آباد، ڈپٹی کمشنر آفس میں ضلعی عملدرآمد کمیٹی برائے انسداد تمباکو نوشی کا اجلاس

^ فیصل آباد(اُردو پوائنٹ اخبارتازہ ترین - آن لائن۔ 28 جنوری2024ء) فیصل آباد کو تمباکو نوشی سے پاک شہر بنانے کے لئے ڈپٹی کمشنر آفس میں ضلعی عملدرآمد کمیٹی برائے انسداد تمباکو نوشی کا اجلاس ایڈیشنل ڈپٹی کمشنر (جنرل)ڈاکٹر شہاب اسلم کی صدارت میں منعقد ہوا۔اجلاس میں'' تمباکو نوشی سے پاک نسل نو'' کے لئے جاری اقدامات کا جائزہ لیا گیا۔ اجلاس میں فیصلہ ہوا کہ سی ای او ایجوکیشن اور ڈائریکٹر کالجز30 سے زائد تعلیمی اداروں میں پائلٹ پراجیکٹ کیلئے منصوبہ بندی کا آغاز کریں گے۔

انسداد تمباکو نوشی قانون کے نفاذ کے لئے ٹاسک فورس کا اجلاس جلد از جلد بلایا جائے گا ماہانہ رپورٹنگ میں تمباکو کنٹرول قانون کو بھی شامل کیا جائے۔پولیس افسران اور پنجاب فوڈ اتھارٹی کے مجاز افسران کی تربیت کی جائے گی۔

(جاری ہے)

ڈسٹرکٹ ریجنل ٹرانسپورٹ اتھارٹی،سٹی ٹریفک پولیس اورپاکستان ریلوے ملکر فیصل آباد میں عوامی گاڑیوں کو سموک فری بنائیں گے۔

اس سلسلہ میں تربیتی ورکشاپ،نو سموکنگ کے سٹیکر/ بورڈ لگائے جائیں گے۔ پارکس اینڈ ہارٹیکلچر اتھارٹی پارکس میں سیر وتفریح کے لئے آنے والوں کوبھی تمباکو نوشی کے خطرات سے آگاہ کرنے کیلئے تشہیری مہم کا آغاز کرے گی۔فیصل آباد ڈویلپمنٹ اتھارٹی تمام بلڈنگز اور ٹریڈ لائسنسوں کی مکمل تفصیلات کمیٹی کو دے گی اور انسداد تمباکو نوشی قانون کو اس کا حصہ بنائے گا۔

علماء مشائخ کی ایک کانفرنس فیصل آباد میں رمضان کے مہینے سے پہلے منعقد کی جائے گی۔سوشل ویلفیئر اینڈ بیت المال فیصل آباد سول سوسائٹی آرگنائزیشن کے ساتھ مل کر آگاہی پروگرام کریں گے جبکہ ڈسٹرکٹ ہیلتھ اتھارٹی فیصل آباد ٹوبیکو سیشن کے ذریعے تمباکو نوشی چھوڑنے والوں کے لئے اقدامات کرے گی۔فیصل آباد چیمبر آف کامرس کے ساتھ تمباکو نوشی سے پاک نسل نو کے حوالہ سے ایم او یو کیا جائے گا۔

ایکسائز اینڈ ٹیکسیشن فیصل آباد تمباکو وینڈر لائسنس پر فی الفوراقدامات کرے گا۔منعقدہ اجلاس سے محمد آفتاب احمد وزارت قومی صحت نے اب تک کی کارکردگی سے آگاہ کیا اور آئندہ کے لائحہ عمل سے شرکاء اجلاس کو اعتماد میں لیا۔انہوں نے فیصل آباد انتظامیہ کی انسداد تمباکو اور تمباکو کے دھویں سے پاک شہر بنانے کے لئے جاری کاوشوں کو سراہا جس کی وجہ سے پاکستان عالمی ادارہ صحت کے علاقائی ملکوں میں سر فہرست ہے۔

انہوں نے کہا کہ پاکستان میں ایک لاکھ ساٹھ ہزار سے زائد افراد سالانہ تمباکو نوشی کی وجہ سے لقمہ اجل بن جاتے ہیں اور1200 پاکستانی بچے جن کی عمر5 سے 15 سال کے درمیان ہے روزانہ تمباکو نوشی شروع کرتے ہیں جو کہ ایک لمحہ فکریہ ہے۔ حکومت پاکستان کو نہ صرف نئے آنے والوں کا راستہ روکنا ہے بلکہ تمباکو نوشی کرنے والوں کو اس لعنت سے چھٹکارے کے لئے ان کی مدد کرنا ہے۔

انہوں نے مزید کہا کہ وزارت قومی صحت پاکستان، فیصل آباد ضلعی انتظامیہ کے ساتھ مل کر تمباکو نوشی کے خاتمے اور تمباکو نوشی سے پاک شہر بنانے تک اپنی کوششیں جاری رکھے ہوئے ہیں۔ایڈیشنل ڈپٹی کمشنر (جنرل) نے کہا کہ 18 سال سے کم عمر بچوں کو سگریٹ اور نئی ٹوبیکو پراڈکٹس کی آسان دستیابی ختم کی جائے گی اس کے لیے ضروری اقدامات کئے جائیں گے شہر فیصل آباد کو سموک فری بنانے کے لیے PSVs۔

اور ہوٹل/ریسٹورنٹ کو مکمل سموک فری بنایا جائے گا۔ تمباکو کے اشتہارات کے خلاف سخت تادیبی کارروائی عمل میں لائی جائے گی ماہانہ رپورٹنگ سسٹم کو فعال بنایا جائے گا۔ضلعی انتظامیہ حکومت پاکستان کی30 فیصد تمباکو کے استعمال میں کمی کے ایجنڈا کی تکمیل میں ہر ممکن تعاون کرے گی۔اجلاس میں ہیلتھ،سٹی پولیس، ٹریفک پولیس،پنجاب فوڈ اتھارٹی، سوشل ویلفیئر،ایکسائز،لوکل گورنمنٹ،ایجوکیشن،ڈائریکٹر کالجز آفس،ماحولیات،ریلوے سمیت تمام اداروں کے نمائندوں نے شرکت کی۔صادق الحسن ڈویژنل کوآرڈینیٹر برائے تمباکو نوشی بھی موجود تھے۔