پشاور میں بجلی کی طویل لوڈشیڈنگ تاجروں کا معاشی قتل قرار

فوری بجلی لوڈشیڈنگ کا خاتمہ کر کے کاروبار کرنے دیا جائے ‘ تاجروں کا مطالبہ

منگل 27 فروری 2024 20:10

پشاور(اُردو پوائنٹ اخبارتازہ ترین - این این آئی۔ 27 فروری2024ء) پشاور کی تاجر برادری نے بجلی کی طویل لوڈشیڈنگ کو تاجروں کا معاشی قتل قرار ددیتے ہوئے مطالبہ کیا ہے کہ فوری بجلی لوڈشیڈنگ کا خاتمہ کر کے کاروبار کرنے دیا جائے بصورت دیگر احتجاجی تحریک شروع کرنے پر مجبور ہونگے ۔اس بات کا فیصلہ تاجر اتحاد خیبر پختونخوا کے منعقدہ اجلاس میں کیا گیا جو زیر صدارت مجیب الرحمان منعقد ہوا جبکہ اجلاس میں مختلف بازاروں کے صدور شوکت اللہ ہمدرد، وحید خان، عزیز خان، ظفر منہاس، نثار خلیل، سہیل خا ن اعوان، نصیر الدین ہاشمی، آفتاب احمد، آیاز خان، حاجی فضل کریم، شیخ اسلم ،جعفر خان، احسان اللہ خان، فضل حیات ،ہمایون خان خلیل، آصف خان، اِبراھیم خان، ملک انیس، حاجی فیاض اور دیگر مشران نے بڑی تعداد میں شرکت کی ۔

(جاری ہے)

اجلاس میں پانچ پانچ گھنٹے بجلی لوڈشیڈنگ پر شدید تشویش کا اظہار کرتے ہوئے شرکاء نے کہا کہ بجلی لوڈشیڈنگ کے باعث کاروبار بری طرح متاثر ہو رہے ہیں جو تاجروں کے معاشی قتل کے مترادف ہے ۔تاجروں نے کہا کہ بجلی نہ ہونے کے باعث درزیوں اور دیگر کاریگر برادری کو سخت مشکلات کا سامنا کرنا پڑتا ہے ،بجلی ہر روز مہنگی ہونے کے باوجود نہیں ہوتی جو افسوس ناک ہے ،تاجر پہلے ہی مہنگائی اور دیگر مسائل سے پریشان ہے ۔انہوںنے مطالبہ کیا کہ فوری بجلی لوڈشیڈنگ کا خاتمہ کر کے تاجروں کو ریلیف فراہم کیا جائے بصورت دیگر احتجاج پر مجبور ہونگے ۔