وزیر اعلیٰ پنجاب کی قیادت میں حلقہ این اے 82 اور پی پی 71 میں شاہراہوں کا جال بچھے گا،وزیر مواصلات ملک صہیب احمد بھرتھ

اتوار 17 مارچ 2024 19:40

سرگودھا (اُردو پوائنٹ اخبارتازہ ترین - اے پی پی۔ 17 مارچ2024ء) صوبائی وزیر مواصلات ملک صہیب احمد بھرتھ کی ہدایت پر محکمہ سی اینڈ ڈی ڈبلیو پنجاب نے تحصیل بھلوال اور تحصیل بھیرہ کی تین شاہراہوں کو بحالی و مرمت کے لیے سالانہ ترقیاتی پروگرام میں شامل کر لیا ہے۔ان شاہراہوں کی تعمیر سے تحصیل بھلوال اور تحصیل بھیرہ کے شہریوں کو بہترین سفری سہولیات فراہم ہوگی اور ان کا سفر آرام دہ ہوگا۔

(جاری ہے)

صوبائی وزیر ِتعمیرات و مواصلات پنجاب ملک صہیب احمد بھرتھ نے کہا کہ لِلہ ٹاؤن سے کندوال شاہ پور براستہ جھال جگیاں، لک موڑ بھلوال روڑ، بھیرہ ملکوال شاہ پور روڑ تا ساہیوال کی شاہراوں پر تعمیراتی کام کو شروع کیا جائے گا۔ اُنہوں نے کہا کہ وزیر اعلی پنجاب مریم نواز شریف نے ان شاہراہوں کو سالانہ ترقیاتی پروگرام میں شامل کرکے تحصیل بھلوال اور تحصیل بھیرہ کی عوام کے دیرینہ مطالبہ کو پورا کیا ہے۔انہوں نے مزید کہا کہ ان شاہراہوں کی تعمیر سے لوگوں کا معیار زندگی بہتر ہوگا۔وزیر اعلی پنجاب مریم نواز شریف کی قیادت میں این اے 82 اور پی پی 71 میں شاہراہوں کا جال بچھے گا اور خراب شاہراہوں کی بحالی ہوگی۔