پاکستان سمیت دنیا بھر کے مسلمان فلسطین کی جانب مارچ کریں،حماس

جمعرات 28 مارچ 2024 15:10

تل ابیب(اُردو پوائنٹ اخبارتازہ ترین - این این آئی۔ 28 مارچ2024ء) اسرائیل نے رمضان المبارک کے فوری بعد مقبوضہ فلسطین کے محصور علاقے غزہ کے مقام رفح میں 6 ہفتوں تک حملوں کا منصوبہ بنا لیا،اسرائیل کی ہٹ دھرمی جاری ہے اور اب غزہ کے علاقے رفح میں حملوں کی منصوبہ بندی بھی مکمل کرلی ہے۔ اسرائیلی اخبار کے مطابق رمضان کے فوری بعد رفح میں 6 ہفتوں تک اسرائیلی حملوں کا منصوبہ بنایا گیا ہے، ان حملوں کے بعد غزہ سے فلسطینیوں کو بے دخل کیا جائے گا اور اسرائیل مصرکوباضابطہ اطلاع دے گا۔

اسرائیلی وزیراعظم نیتن یاہو نے اقوام متحدہ کی قرارداد بھی مسترد کر دی اور کہا کہ حماس کو سمجھ جانا چاہیے اسرائیل پر عالمی دبا کام نہیں کریگا۔انہوں نے کہا کہ سلامتی کونسل میں امریکی فیصلہ بہت زیادہ برا اقدام تھا، اسرائیلی وفد کو امریکا نہ بھیجنے کا فیصلہ حماس کیلئے پیغام تھا کہ کوئی بھی عالمی دبا ئوکام نہیں آئے گا۔

(جاری ہے)

دوسری جانب مقبوضہ فلسطین کی مزاحمتی تنظیم حماس کے ملٹری کمانڈر محمد الضیف نے غیر معمولی بیان جاری کیا ہے۔

اپنے آڈیو بیان میں ملٹری کمانڈر نے اردن، لبنان، پاکستان اور ملائیشیا سمیت تمام عرب اور اسلامی ممالک کے مسلمانوں سے اپیل کی کہ مسلمان فلسطین کی جانب مارچ شروع کریں۔ادھر اسرائیل کی جانب سے غزہ پر بمباری کا سلسلہ جاری ہے اور مزید 70 سے زائد فلسطینی شہید ہوگئے۔ 7 اکتوبر سے اب تک اسرائیلی حملوں میں شہدا کی تعداد 32 ہزار سے تجاوز کرگئی ہے۔