خواہش ہے عدلیہ کی جو بھی شکایات ہیں دور ہوجائیں، خواجہ آصف

جنرل باجوہ کو توسیع دینے میں تینوں پارٹی ذمہ دار ،سیاستدانوں کو آئین کی پاسداری پر بیٹھ کر بات کرنی چاہیے،وزیردفاع

جمعرات 28 مارچ 2024 22:25

اسلام آباد(اُردو پوائنٹ اخبارتازہ ترین - این این آئی۔ 28 مارچ2024ء) وزیر دفاع خواجہ آصف نے کہاہے کہ وزیراعظم نے یقین دہانی کروائی ہے کہ عدلیہ کو جو مدد درکار ہو گی فراہم کی جائے گی،جنرل باجوہ کو توسیع دینے میں تینوں پارٹی ذمہ دار ہیں،سیاستدانوں کو آئین کی پاسداری پر بیٹھ کر بات کرنی چاہیے۔نجی ٹی وی کے پروگرام میں گفتگو کرتے ہوئے وزیر دفاع نے کہا کہ میری خواہش ہے کہ عدلیہ کی جو بھی شکایات ہیں دور ہوجائیں،اگر شکایت آئی ہے تو پراسیس کو فالو کیا جائے گا۔

(جاری ہے)

وزیر دفاع نے کہاکہ فیض آباد دھرنے میں ایک افسر کی پیسے دیتے ویڈیو بنی اور ریکارڈ پر ہے،جب پیسوں کی بات پوچھی گئی تو کہا گیا واپسی کا کرایہ دیا گیا۔خواجہ آصف نے کہا کہ سیاستدانوں کا کردار بھی دیکھ لیں اس حمام میں سب ننگے ہیں،جنرل باجوہ کو توسیع دینے میں تینوں پارٹی ذمہ دار ہیں،سیاستدانوں کو آئین کی پاسداری پر بیٹھ کر بات کرنی چاہیے۔انہوں نے کہا کہ ججز کے خط کے معاملے پر ادارے آپس میں گفتگو کر رہے ہیں۔خواجہ آصف نے کہاکہ وزیراعظم نے یقین دہانی کروائی ہے کہ عدلیہ کو جو مدد درکار ہو گی فراہم کی جائے گی۔