ٹیکس چوری میں ملوث سگریٹ انڈسٹری کیخلاف کریک ڈائون، کروڑوں سگریٹس بنانے والا سامان ضبط

مظفر آباد (اُردو پوائنٹ اخبارتازہ ترین - این این آئی۔ 03 اپریل2024ء) آزاد کشمیر حکومت نے ٹیکس چوری میں ملوث سگریٹ انڈسٹری کیخلاف کریک ڈائون تیز کرتے ہوئے لاکھوں کلو خام تمباکو اور کروڑوں سگریٹ کی تیاری کا سامان ضبط کرلیا۔تفصیلات کے مطابق آزاد کشمیر پولیس اور ایکسائز و ٹیکسیشن ڈیپارٹمنٹ کی مشترکہ ٹیموں نے کریک ڈائون کرتے ہوئے میرپور اور بھمبر میں ٹیکس چوری میں ملوث سگریٹ فیکٹریوں کے خلاف کارروائیاں کیں۔

کریک ڈائون کے دوران نیشنل ٹوبیکو کمپنی، والٹن ٹوبیکو اور چنار ٹوبیکو کمپنی کے خلاف کارروائی کی گئی۔بھمبر میں نیشنل ٹوبیکو کمپنی کے گودام پرچھاپے کے دوران 3لاکھ 84 ہزار کلو سے زائد خام تمباکو ضبط کیا گیا، جبکہ برنالہ میں فیکٹری پر چھاپے کے دوران غیر قانونی سگریٹ کے 10کارٹن ضبط کئے گئے۔

(جاری ہے)

اس کے علاوہ 10کروڑ سگریٹ سٹکس کی تیاری کیلئے 10تمباکو بیگ، 19سگریٹ پیپر رول بھی ضبط کئے گئے ہیں۔

برنالہ میں چنار ٹوبیکو فیکٹری پر چھاپے کے دوران 731 تمباکو بیگ ضبط کیے گئے۔نیشنل ٹوبیکو کمپنی کے لیے کرایہ پر لیے گئے گھر پر چھاپے کے دوران 85کارٹن فلٹر راڈ کے ضبط کیے گئے، چھاپے میں 67کارٹن سگریٹ پیپر، 17کارٹن غیر قانونی سگریٹ کے قبضے میں لے لئے گئے ، علاوہ ازیں 16کارٹن سگریٹ ٹیپ، 10 ہزار کلو تمباکو سمیت بھاری مقدار میں خام مال بھی ضبط کر لیا گیا۔