کراچی میں اسٹریٹ کرائمز کے باوجود وزیر داخلہ سندھ پولیس کی کارکردگی سے مطمئن

کراچی (اُردو پوائنٹ اخبارتازہ ترین - این این آئی۔ 09 اپریل2024ء) وزیر داخلہ سندھ نے کہا ہے کہ اسٹریٹ کرائمز پر کوئی سمجھوتہ نہیں، پولیس کو کہا ہے کسی کو نہ بخشا جائے، پولیس کی کارکردگی سے مطمئن ہوں۔وزیرداخلہ سندھ ضیاالحسن لنجار نے شہر کے مختلف علاقوں کا دورہ کیا وہ ضلع وسطی میں لیاقت آباد، ناظم آباد اور نارتھ ناظم آباد کے علاقوں میں گئے۔

میڈیا سے گفتگو میں انھوں نے کہا کہ شہر بھر کا دورہ کیا ہے، سیکیورٹی انتظامات بہتر کر رہے ہیں۔انھوں نے کہا کہ پولیس کی کارکردگی سے مطمئن ہوں، لٹیروں کا لوگوں سے چھینا جھپنی اور پھر مارنا حیرت انگیز ہے، ایم کیو ایم کے لوگ سستی شہرت کیلئے ایسے بیانات دے رہے ہیں، ایم کیو ایم کے وزیر داخلہ کے دور کی کرائم رپورٹ اور آج کی رپورٹ دیکھ لیں، واضح فرق ہے۔

(جاری ہے)

ضیا لنجار نے کہا کہ پولیس شہر میں قیام امن کیلئے بھرپور کوششیں کررہی ہے، قیام امن کے لیے پولیس کی بیشمار قربانیاں ہیں۔ ذمہ داری ادا نہ کرنیوالے پولیس افسران کیخلاف کارروائی بھی کی جاتی ہے۔انھوں نے کہا کہ کراچی میں پولیس نظرآرہی ہے، لوگ مطمئن ہیں، حیدری مارکیٹ میں لوگوں نے کہا یہاں پر چوری کی کوئی واردات نہیں ہوئی۔ امید ہے کہ سندھ حکومت اور پولیس ملکر حالات کو قابو میں کرلیں گے۔

وزیر داخلہ سندھ نے کہا کہ جس تھانے کی حدود میں واردات ہورہی ہے وہاں کا ایس ایچ او معطل کررہے ہیں۔ اسٹریٹ کرائمز سماجی مسئلہ ہے، سماجی مسئلے میں فوج کونہیں لایا جاتا۔ کراچی کے لوگ بڑی خوشحالی سے زندگی گزر بسر کررہے ہیں۔انھوں نے کہا کہ اسٹریٹ کرائمز میں غیر ملکی بھی ملوث ہیں، برمی، بنگالی اور کچھ چینی شہری بھی غیرقانونی رہ رہے ہیں۔ کچے کے ڈاکوں اور سپورٹرز کو ایک چانس ضروردینگے کہ سرینڈر کردیں۔ ڈاکوں نے سرینڈر نہیں کیا تو بہت بھرپور کارروائی ہونے جارہی ہے۔