وساکھی میلہ وخالصہ جنم دن کی تقریبات اختتام پذیر ہوگئیں

لاہور (اُردو پوائنٹ اخبارتازہ ترین - اے پی پی۔ 14 اپریل2024ء) خالصہ جنم دن کی 325ویں اور وساکھی میلہ کی تقریبات گورودوارہ پنجہ صاحب حسن ابدال میں اختتام پذیر ہوگئیں، بھارت سمیت دنیا بھر سے آئے سکھ یاتریوں سمیت آسٹریلیا ،نیپال اور دیگر 10 ملکوں کے سفیر وں نے بھی تقریبات میں شرکت کی ۔ترجمان کے مطابق مرکزی تقریب سے خطاب کرتے ہوئے وفاقی وزیر دفاع خواجہ محمد آصف نے مہمانوں کو وساکھی میلہ کی مبارک باد دیتے ہوئے کہا کہ پاکستان میں اقلیتوں کو مکمل مذہبی آزادی حاصل اور ان کی عبادت گاہیں و املاک محفوظ ہیں ۔

انہوں نے کہاکہ غیر مسلموں کی فلاح و بہبود کے بھرپور اقدامات کیئے جا رہے اور سکھ مسلم دوستی کے رشتہ میں دن بدن مضبوطی آ رہی ہے۔ پاکستان سکھ گوردوارہ پربندھک کمیٹی کے پردھان و صوبائی وزیر اقلیتی امور سردار رامیش سنگھ اروڑا نے خطاب کرتے ہوئے کہا کہ پاکستان دنیا کا واحد ملک ہے جہاں سکھ میرج ایکٹ نافذ عمل ہونے جا رہا ہے ۔

(جاری ہے)

انہوں نے کہاکہ پاکستان میں سکھوں کا تاریخی ورثہ محفوظ اور ہمسایہ ملک میںاس حوالے سے غلط پروپیگنڈا ہوتا ہے۔

تقریب میںسینیٹر سردار گل دیپ سنگھ، سیکرٹری بورڈ فرید اقبال، ایڈیشنل سیکرٹری شرائنز رانا شاہد سلیم، ایڈمنسٹریٹر کراچی محمد آصف خان، ڈپٹی ایڈمنسٹریٹر حسن ابدال یاسر اصغر مونگا، عاشر یونس ایم پی اے، بابا گرپال سنگھ، سردار ستونت سنگھ اور ڈاکٹر ممپال سنگھ سمیت دیگر مختلف سیاسی و مذہبی اقلیتی رہنمائوں نے شرکت کی۔ ترجمان کے مطابق بھا رتی سکھ رہنمائوں نے متروکہ وقف املاک بورڈ کی جانب سے گورودوارہ پنجہ صاحب کو خوبصورت انداز میں سجانے اور یاتریوں کو رہا ئش سمیت دیگر اعلی انتظامات پر حکومت پاکستان اور ٹرسٹ بورڈ انتظامیہ کا خصوصی شکریہ ادا کیا،غیر ملکی سفیروں نے بھی انظامات کو سراہا۔