فواد چودھری ، علی زیدی یا پریس کانفرنس کرنے والوں کی واپسی کا فیصلہ عمران خان کریں گے

اسلام آباد ( اردوپوائنٹ اخبارتازہ ترین ۔ 16 اپریل 2024ء) پاکستان تحریک انصاف کے چیئرمین بیرسٹر گوہر خان نے کہا ہے کہ فواد چودھری ، علی زیدی یا دیگر کی واپسی کا فیصلہ عمران خان کریں گے، مشکل وقت میں یہ لوگ پارٹی چھوڑ گئے تھے، عمران خان فیصلہ کریں کہ انہیں کن شرائط پر واپس لیا جائے؟ہمیں اپنے ورکرز کا خیال رکھنا ہے۔ انہوں نے جیو نیوز کے پروگرام میں گفتگو کرتے ہوئے کہا کہ سیاست میں مذاکرات کے دروازے بند نہیں ہوتے، اس حکومت کے ساتھ ہم کیا مذاکرات کریں؟ کل پارلیمنٹ کا سیشن ہم نے 184تھری کے تحت بلایا تھا، جوڈیشری پر بات ہونی تھی لیکن اسپیکر نے ہمیں بولنے کا موقع نہیں دیا، جہاں تک عمران خان کی رہائی کا تعلق ہے، عمران خان حکومت کے ساتھ ڈیل کے نتیجے میں کسی صورت رہا نہیں ہوں گے، ہم عدالتوں میں جاچکے ہیں، یہ سیاسی نتقامی کیسز ہیں، بغیر دلائل کے فیصلے دیئے گئے، اگر عدلیہ کیسز کو کھلے دل کے ساتھ انصاف کے تقاضے پورے کرے ، تو امید ہے کہ اسی مہینے ہمارے تینوں کیسزکے فیصلے ختم ہوجائیں گے اور عمران خان رہا ہوجائیں گے، عمران خان کو عید سے پہلے ہی رہا ہوجانا چاہیئے تھا،جو کیس چل رہا ہے اس کی اپیل میں اتنا ٹائم نہیں لگنا چاہیے، توشہ خانہ نیب کا کیس ہے ، نیب کے پراسکیوٹر نے خود تسلیم کیا کہ اس کیس کے فیصلے کو معطل کردیا جائے۔

(جاری ہے)

القادر ٹرسٹ کیس میں تو عمران خان ٹرسٹی ہیں ، کچھ لینے دینے کی بات نہیں۔ آج عمران خان سے ملاقات کیلئے گئے تو درمیان میں شیشہ تھا، ان کا پلان ہے کہ عمران خان کو جیل میں زیادہ عرصہ رکھا جائے گا، شیشہ اس لئے رکھا کہ میں اور عمران خان کان میں سرگوشی کرتے تھے وہ نہ کرسکیں، یہ ہائیکورٹ کے حکم کی خلاف ورزی ہے۔ میں پارٹی امور سے متعلق تمام ہدایات عمران خان سے لیتا ہوں، میں ہمیشہ کہتا ہوں کہ میں عمران خان کا متبادل نہیں ہوں، میرے پارٹی میں ہمارے اختلافات ہوتے بھی رہتے ہیں، لیکن ہمارا اتحاد برقرار ہے۔

بیرسٹر گوہر نے کہا کہ فواد چودھری ، علی زیدی یا پریس کانفرنس کرنے والوں کی واپسی کا فیصلہ عمران خان کریں گے، کیونکہ مشکل وقت میں یہ لوگ پارٹی چھوڑگئے تھے، عمران خان فیصلہ کریں گے اگر ان کوواپس لینے کیلئے شرائط کیا ہوں گی؟ہمیں اپنے ورکرز کا خیال رکھنا ہے۔ہماری تحریک میں 6 جماعتیں ہیں، ہمارا مقصد صرف مینڈیٹ کو واپس لینا ہی نہیں بلکہ یقینی بنانا بھی ہے کہ آئندہ کسی بھی الیکشن میں دھاندلی نہ ہو، اسی طرح عدلیہ پر بھی کوئی دباؤ نہ ڈالے۔