یوم تکبیر منانے کا فیصلہ عمران خان کیس کے فیصلے کی وجہ سے کیا گیا‘نون لیگ کو پہلے کبھی چھٹی منانے کا خیال کیوں نہیں آیا؟.لطیف کھوسہ

لاہور(اردوپوائنٹ اخبارتازہ ترین-انٹرنیشنل پریس ایجنسی۔29مئی۔2024 ) پاکستان تحریک انصاف کے راہنما سردار لطیف کھوسہ نے کہا ہے کہ 28 مئی کو عام تعطیل کا اعلان کیا گیا کیونکہ اس دن سابق وزیراعظم عمران خان کیس کا فیصلہ سنانا تھا ورنہ مسلم لیگ (ن) نے اس دن پہلے کبھی چھٹی کا اعلان نہیں کیا. لاہور ہائی کورٹ میں صحافیوںسے گفتگو کرتے ہوئے سابق وفاقی وزیر اور تحریک انصاف کا راہنماءسردار لطیف کھوسہ نے کہا کہ عدت کیس میں جج صاحب نے کیس کا فیصلہ نہیں سنایا مخالف وکیل نے آج فیصلہ نا دینے کی استدعا کی.

(جاری ہے)

انہوں نے کہا کہ عدالت کے اندر کھڑے ہوکر ماحول خراب کرنے کی کوشش کی گئی عدالت کے اندر نازیبا الفاظ استعمال ہوئے کمرہ عدالت میں ہماری خواتین بھی موجود تھیں سردار لطیف کھوسہ نے کہا کہ 28 مئی کو چھٹی کا اعلان کیا گیا کیونکہ اس دن عمران خان کے کیس کا فیصلہ سنایا جانا تھا. انہوں نے کہا کہ مسلم لیگ( ن) کی حکومت پہلے بھی آئی لیکن اس دن کبھی چھٹی کا اعلان نہیں کیا گیا مگر کل سائفر کیس کا فیصلہ آنا تھا اس لیے عام تعطیل کا اعلان کردیا گیا لطیف کھوسہ نے کہا کہ شہبازشریف نے کل تقریر میں عدلیہ کے لیے نامناسب الفاظ استعمال کیے، شہباز شریف جعلی وزیراعظم ہیں نیب نے بحریہ ٹاﺅن پر چھاپہ مارا اور وہاں سے القادرٹرسٹ کا ریکارڈ تلاش کرتے رہے.

واضح رہے کہ حکومت کی جانب سے یوم تکبیر پر عام تعطیل کے غیرمتوقع اعلان نے سابق وزیراعظم و پاکستان تحریک انصاف کے بانی عمران خان اور شاہ محمود قریشی کی سائفر کیس میں سزا کے خلاف اپیلوں پر متوقع فیصلے میں تاخیر کر دی، جس کی سماعت منگل کہ روز سماعت کے لیے مقرر کی گئی تھی.