کراچی میں 22مقامات پر مویشی منڈیاں لگانے کا نوٹیفکیشن جاری

پیر 3 جون 2024 22:40

کراچی(اُردو پوائنٹ اخبارتازہ ترین - این این آئی۔ 03 جون2024ء) عید الاضحی کے سلسلے میں کمشنر کراچی نے شہر میں 22مقامات پر مویشی منڈیاں لگانے کی اجازت دے دی، منڈیاں قائم کرنے کا نوٹیفکیشن جاری کردیا گیا۔ کمشنر کراچی کی جانب سے جاری کردہ نوٹیفکیشن کے مطابق ضلع جنوبی کے 3مقامات پر منڈیا ں لگائی جائیں گی جس میں سنڈے بچت بازار گرائونڈ نزد ہائپراسٹار کلفٹن پر مویشی منڈی بلدیہ عظمیٰ کراچی کے ماتحت ہوگی، اسی طرح ماری پورروڈ نزد دعا ہوٹل لیاری، اور محمدی گرائونڈ عثمان آباد میں مویشی منڈیاں لگیں گی جو ٹان میونسپل کارپوریشن کے ماتحت ہوں گی۔

اسی طرح ضلع شرقی میں احسن آباد میں موشی منڈی لگے گی جو ٹائون میونسپل کارپوریشن کے ماتحت ہو گی، ضلع غربی میں تین مقامات پر مویشی منڈیاں لگیں گی، بلدیہ عظمیٰ کراچی کے تحت کے ڈی اے گرائونڈ سرجانی ٹائون، بکرا منڈی گل محمد گوٹھ نزد نورانی ہوٹل ، اور تیسری منڈی اورنگی سیکٹر 4 میں قائم کی جائے گی۔

(جاری ہے)

ضلع وسطی میں سب سے زیادہ پانچ منڈیا ں لگیں گی، سنڈے بازار گرانڈ سیکٹر 11ڈی نارتھ کراچی اور لیاقت آباد نمبر 8نزد فٹ بال گرائونڈ پر لگنے والی منڈیاں کے ایم سی کے تحت ہوں گی، تیسری منڈی محمدی گرائونڈ لیاقت آباد پر قائم کی جائے گی جو ٹی ایم سی کے ماتحت ہوگی۔

اسی طرح آئی ٹی گرائونڈ شادمان سینٹر سیکٹر 14بی نارتھ ناظم آباد ، اور افغان گرائونڈ ایف بی ایریا پر لگنے والی منڈیاں بھی کے ایم سی کے ماتحت ہوں گی۔ضلع ملیر میں اسماعیل گبول گوٹھ یو سی8اوردوسری مویشی منڈی گلشن حدید چورنگی پر لگے گی، یہ دنوں منڈیاں ٹی ایم سی ملیر کے ماتحت ہوں گی۔ ضلع کیماڑی میں تین مویشی منڈیاں لگائی جائیں گی؛ یوسف گوٹھ بلدیہ ٹائون ، اور حسرت موہانی کالونی میں لگنے والی مندیاں ٹی ایم سی اورلیاری بکرا پیڑی کی منڈی کے ایم سی کے تحت ہوگی۔

ضلع کورنگی میں چار مقامات پر مویشی منڈیاں لگائی جائیں گی، اولڈ کے ٹی سی ڈپو نزد انڈس اسپتال، عظیم پوری قبرستان کے قریب اور فرینڈ گرائونڈ 1300روڈ لانڈھی ٹائون پر ٹی ایم سی کے تحت مویشی منڈیاں قائم کی جائیں گی۔چوتھی مویشی منڈی کریک روڈ سنڈے بچت بازار قیوم آباد میں لگے گی جو بلد یہ کراچی کے ماتحت ہو گی، جبکہ کر اچی کی سب سے بڑی مویشی منڈی نادرن بائی پاس پر قائم ہے۔کمشنرکراچی نے کراچی قانونی طور پر 22مویشی منڈیاں لگانے کی اجازت دی ہے اس کے باوجود شہر کے مختلف علاقوں میں کئی غیرقانونی مویشی منڈیاں لگی ہو ئی ہے۔