uراجن پور میں اشتہاری ملزمان کی فائرنگ سے پولیس اہلکار شہید

بدھ 19 جون 2024 21:30

ھ*جام پور (اُردو پوائنٹ اخبارتازہ ترین - آن لائن۔ 19 جون2024ء) پنجاب کے ضلع راجن پور کے علاقے جام پور کی حدود میں مبینہ اشتہاری ملزمان کی فائرنگ سے پولیس کانسٹیبل تنویر عباس شہید اور دوسر کانسٹیبل جاوید اقبال زخمی ہو گیا۔ پولیس کے مطابق جام پور میں اشتہاری ملزمان کی فائرنگ سے ایک اہلکار شہید اور دوسرا زخمی ہوگیا، جس پر انسپکٹرجنرل (آئی جی) پنجاب ڈاکٹر عثمان انور نے واقعے کا نوٹس لیتے ہوئے ڈیرہ غازی خان کے آر پی او سے رپورٹ طلب کرلی۔

(جاری ہے)

آئی جی پنجاب ڈاکٹر عثمان انور نے کہا کہ شہید کانسٹیبل تنویر عباس کی لازوال قربانی کو خراج عقیدت پیش کرتے ہیں، انہوں نے نے شہریوں کی جان و مال کی حفاظت کے دوران جام شہادت نوش کیا ہے۔ انہوں نے کہا کہ شہید کانسٹیبل تنویر عباس کے اہل خانہ کو تنہا نہیں چھوڑیں گے۔ ڈاکٹر عثمان انور نے ڈی پی او راجن پور کو فائرنگ میں ملوث ملزمان کی فوری گرفتاری کا حکم دیا اور زخمی پولیس اہلکار جاوید اقبال کو علاج معالجے کی بہترین سہولیات کی فراہمی یقینی بنانے کی ہدایت کردی۔