حقیقت ہے ہمیں آئی ایم ایف کے ساتھ مل کر بجٹ بنانا پڑا، شہباز شریف

امید ہے آئی ایم ایف سے خوشخبری ملے گی ،فی الحال کچھ کہنا قبل از وقت ہوگا، وزیر اعظم کا خطاب

منگل 25 جون 2024 21:30

اسلام آباد (اُردو پوائنٹ اخبارتازہ ترین - این این آئی۔ 25 جون2024ء) وزیراعظم شہباز شریف نے کہا ہے کہ حقیقت ہے ہمیں عالمی مالیاتی ادارے (آئی ایم ایف)کے ساتھ مل کر بجٹ بنانا پڑا۔قومی اسمبلی اجلاس سے خطاب میں شہباز شریف نے کہا کہ حالات کا یہی تقاضا ہے، آئی ایم ایف کا اگر آج جواب آگیا تو کل پیش کریں گے۔انہوں نے کہا کہ امید ہے آئی ایم ایف سے خوشخبری ملے گی لیکن فی الحال کچھ کہنا قبل از وقت ہوگا۔

(جاری ہے)

وزیراعظم نے کہا کہ اگر آج آئی ایم ایف کا جواب آگیا تو کل آپ کو بتادیں گے، پاکستان ورکس ڈپارٹمنٹ کے خاتمے کا اعلان ہوچکا ہے۔انہوںنے کہاکہ پی ڈبلیو ڈی میں بندر بانٹ ہوتی ہے اس کے خاتمے کا اعلان کیا گیا، وہاں اتنی کرپشن ہوتی ہے، سب ممبرز کو پتا ہے۔انہوں نے کہا کہ ہماری حکومت کے دور میں جنوبی پنجاب کا بجٹ زیادہ اور ملازمتوں کا شیئر زیادہ تھا۔شہباز شریف نے کہا کہ جنوبی پنجاب میں لیپ ٹاپ اسکیم میں کوٹہ زیادہ تھا ،وفاقی حکومت کے منصوبے پنجاب حکومت نے اپنے وسائل سے بنائے۔انہوںنے کہاکہ جنوبی پنجاب میں وزیراعلی روزگار اسکیم کا کوٹا 10فیصد زیادہ رکھا گیا۔