کراچی کے اوسط درجہ حرارت میں 10 گنا اضافہ، 2015 کے ہیٹ ویو کے بعد 2024 گرم ترین سال ریکارڈ

کراچی(اُردو پوائنٹ اخبارتازہ ترین - این این آئی۔ 01 جولائی2024ء) محکمہ موسمیات کے مطابق کراچی کے اوسط درجہ حرارت میں 10 گنا اضافہ ہواہے، 2015 کے ہیٹ ویو کے بعد 2024 گرم ترین سال ریکارڈ کیاگیا۔چیف میٹرولوجسٹ سردار سرفراز کے مطابق موجودہ موسمی حالات 2015 کی ہیٹ ویو کے بعد سب سے زیادہ گرم ہیں جس میں زیادہ درجہ حرارت 44.8 ڈگری سینٹی گریڈ تک پہنچ گیا تھا۔

انہوں نے کہا کہ اس سال زیادہ سے زیادہ درجہ حرارت 42 ڈگری سینٹی گریڈ ریکارڈ کیا گیا، ہم 9 سال کے بعد اسی طرح کے موسمی حالات دیکھ رہے ہیں، کراچی میں جاری ہیٹ ویو کے دوران ماہانہ اوسط درجہ حرارت 4 ڈگری سینٹی گریڈ زیادہ ریکارڈ کیا گیا۔سردار سرفراز نے بتایاکہ 2015 اور 2024 میں گرمی کی شدت میں اضافہ، بنیادی طور پر کم ہوا کے دبائو کی وجہ سے تھے۔

(جاری ہے)

انہوں نے کہا کہ کراچی میں خاص طور پر نمی کا تناسب زیادہ رہتا ہے جس کی وجہ سے گرم موسم ناقابل برداشت ہوجاتا ہے، کیونکہ اس سے درجہ حرارت میں مزید اضافہ ہوجاتا ہے، رواں ہفتے نمی کا تناسب 50 فیصد یا اس سے زائد رہا۔انہوں نے کہا کہ رواں سال جون کے مہینے کا کم سے کم درجہ حرارت بھی اوسط درجہ حرارت سے زیادہ رہا، جو اوسطا 29-30 ڈگری سینٹی گریڈ رہا۔

کراچی میں جون کے مہینے کا تاریخ کا سب سے زیادہ درجہ حرارت 47 ڈگری سینٹی گریڈ ریکارڈ کیا گیا، جو 18 جون 1979 کو ریکارڈ کیا گیا تھا، جب کہ مئی کے مہینے کا سب سے زیادہ درجہ حرارت 47 ڈگری سینٹی گریڈ تھا جو 9 مئی 1938 کو ریکارڈ کیا گیا تھا۔سردار سرفراز نے ورلڈ ویدر ایٹریبیوشن کی ایک تحقیق (جس نے پاکستان میں 2022 کے تباہ کن سیلاب کو موسمیاتی تبدیلی کی وجہ قرار دیا)، کا حوالہ دیتے ہوئے کہا کہ دنیا بھر میں گرمی کی غیر معمولی لہر کی وجہ سے موسم کے انداز بدل گئے ہیں، مطالعات سے پتہ چلتا ہے کہ عالمی درجہ حرارت میں اضافے کے ساتھ ہی موسم کی شدت میں اضافہ ہوتا چلا جائیگا۔

کراچی یونیورسٹی کے انسٹی ٹیوٹ آف انوائرمنٹل اسٹڈیز کے سینئر ٹیچر اور محقق ڈاکٹر عامر عالمگیر نے کہاکہ کراچی کا سالانہ اوسط درجہ حرارت 25.9 ڈگری سینٹی گریڈ ہے اور اوسط سالانہ بارش تقریبا 194 ملی میٹر ہے۔انہوں نے کہا کہ گزشتہ 59 سالوں کے دوران اوسط درجہ حرارت میں 2.25 سینٹی گریڈ کا اضافہ ریکارڈ کیا گیا ہے، یعنی ہر دہائی میں 0.38 سینٹی گریڈ کا اضافہ ہوا، جو عالمی درجہ حرارت کے مقابلے میں 10 گنا زیادہ ہے۔

ڈاکٹر عامر عالمگیر نے کہاکہ کراچی میں نمی دسمبر میں 58 فیصد تک ہوتی ہے، اگست سب سے خشک مہینہ ہوتا ہے جس میں 85 فیصد تک نمی ہوتی ہے، 2015 کی ہیٹ ویو کے دوران، ہیٹ انڈیکس 66 ڈگری سینٹی گریڈ تک پہنچ گیا تھا۔کراچی میں بجلی کی مسلسل بندش اور پانی کی عدم فراہمی سے نچلے طبقے کے لوگوں کے لیے تباہ کن نتائج برآمد ہوئے ہیں، بدقسمتی سے اس سال بھی ہیٹ ویو کے دوران کئی قیمتی جانیں ضائع ہوئیں۔